Tasqyn sý Qamys-Samar, Jaltyrkól, Sorkól, Orysqopa, Edilsor, Qoǵaly, Itbatyr, Birqazan, Qısyqqamys, Atpýt, Tasońǵar, Saǵyrbaı, Jańatalap, Ótegen, Edige, Aıdyn, Sary Aıdyn, Qańbaqty, Qazybaı-1, Qazybaı-2, Kókterek kólderi men Muqyr, Qońyrsaı, Quıryqsaı ózenderine jiberildi, dep habarlaıdy aqshamnews.kz.
Sondaı-aq Jaıyq-Kóshim men Qos ózen júıeleri arqyly 18 myń gektardan astam shabyndyq jer sýlandy. Bul óńirdiń ekologıalyq jaǵdaıyn jaqsartýǵa jáne sharýalardy qajetti mal azyǵy qorymen qamtamasyz etýge múmkindik beredi.
Jyl basynan beri Jaıyq ózeninen Jaıyq-Kóshim sýarý-sýlandyrý júıesine 307 mln tekshe metr sý jiberildi. Onyń 124 mln tekshe metri tasqyn sý. Búgingi tańda Jaıyq-Kóshim sýarý-sýlandyrý júıesindegi kaskadty sý qoımalarynda 188 mln tekshe metr nemese 72% sý jınaldy.
Al Shaǵan sý qoımasy sý tasqyny kezeńinde 100% tolyp, 19,1 mln tekshe metr sý jınady. Bul sý Oral qalasynyń kásiporyndaryna, saıajaı qoǵamdary men sharýa qojalyqtaryna kelisimshart negizinde beriledi.
«Batys Qazaqstan oblysynda kóktemgi sý tasqyny kezeńi qaýipsiz ótti. Fılıalǵa qarasty sý sharýashylyǵy nysandary tasqyn sýyn qaýipsiz ótkizýdi qamtamasyz etip qana qoımaı, ony ózen-kólderge, jaıylymdyq, shabyndyq jerlerge baǵyttady. Sondaı-aq jazǵy-kúzgi kezeńde jergilikti sharýa qojalyqtary men óndiris oshaqtaryn sýmen qamtý úshin tasqyn sýyn qoımalarǵa jınady», - dedi Batys Qazaqstan oblysynyń «Qazsýshar» fılıaly dırektory mindetin atqarýshy Raýan Hýsaınov.