3 mamyr túngi ýaqytta megapolıste naızaǵaı oınap, qalada soltústik-batystan soltústik- shyǵysqa qaraı qatty jel soǵady.
Onyń jyldamdyǵy sekýndyna 18 metrge deıin jetedi. Bul týraly Almaty qalasy TJD habarlady.
Sondyqtan Tótenshe jaǵdaılar departamenti qala turǵyndaryna kólikti aǵashtyń astynda qaldyrmaýǵa keńes berdi. Odan bólek:
– syrtqa qajettiliksiz shyqpaý (múmkindiginshe úıde bolý) kerek;
– úıde esik pen terezelerdi myqtap jabý jáne aýladan, ashyq balkondardan zıan keltirýi múmkin turmystyq zattardy alyp tastaý usynylady;
– kóshede júrgende bılbordtardyń, aǵashtardyń astynda, aıaqtalmaǵan ǵımarattarda jasyrynýǵa bolmaıdy;
– qatty jel kezinde elektr berý jelileriniń astynda turý jáne úzilgen elektr symdaryna jaqyndaý óte qaýipti.
Búgin Almatynyń keı aýdandarynda, ásirese taýly aımaǵynda burshaq jaýdy. Tabıǵı qubylystyń beınejazbalary áleýmettik jelide tarady.