Almatyda 1,5 jasar balaǵa aıaq barmaǵy qolyna aýystyryp salyndy.
Almatyda №2 balalar qalalyq klınıkalyq aýrýhanasy (budan ári - №2 BQKA) bazasynda aıaqtary men qoldarynda sırek patologıasy bar balalarǵa ota jasaldy.
№2 BQKA travmatolog-mıkrohırýrgtary jáne álemge áıgili mıkrohırýrg, Máskeý qalasynyń RHDÝ travmatologıa jáne ortopedıa kafedrasynyń profesory Igor Golýbevpen birge 6 pasıentke ota jasaldy.
"Meıirimdilik "erikti qoǵamdyq qory" men Almaty qalasy Qoǵamdyq densaýlyq saqtaý basqarmasynyń uıymdastyrýymen ótken úsh kúndik master-klass aıasynda kúrdeli mıkrohırýrgıalyq otalar jasaldy.
Týa bitken jáne júre paıda bolǵan aqaýlary bar alty qazaqstandyq balanyń aıaq-qoldaryna jasalǵan otalar sátti aıaqtaldy.
Balanyń ájesi Mıra Qalıbekova bylaı dedi:
"Meniń nemeremniń týylǵan kezde oń qolynyń bilegi bolmady, al sol qolynyń bas barmaǵy tolyq damymaǵan boldy. Qyzym "Meıirimdilik" qoǵamdyq qoryna júgindi, tekserýden keıin dárigerler aıaqtyń barmaǵyn sol qolǵa aýystyryp salýǵa bolatynyn aıtty. Bul oǵan sol jaq qolymen krýjkany ustaýǵa, sol qoldy tolyǵymen paıdalanýǵa múmkindik beredi. Bolashaqta mektepke barǵanda sol qolymen qalam ustap, jaza alý úshin qajet", - deıdi balanyń ájesi.
"Múbarak oń qoldyń aplazıasymen jáne sol qoldyń birinshi jáne ekinshi saýsaqtarynyń falangalary joq bolyp dúnıege keldi. Bala júredi, oınaıdy, ata-anasy oǵan oń bilegine kosmetıkalyq protezge tapsyrys berdi. Damý jaǵynan bala óz qatarynan qalmaıdy, onyń barlyq analızderi qalypty. Saýsaqty qolǵa transplantasıalaý boıynsha ota segiz saǵatqa sozyldy. Múbarakqa qalpyna kelý qajet. Mundaǵy barlyq otalar ártúrli sıpatta boldy. Onyń ishinde týa bitken aqaýlar da, jaraqat alǵannan paıda bolǵan erekshelikter de bar",- dep atap ótti №2 Balalar qalalyq klınıkalyq aýrýhanasynyń dırektory Marat Rabandıarov.
"Almaty qalasynnyń №2 Balalar qalalyq klınıkalyq aýrýhanasynyń 20-dan astam qyzmetkeri master-klassqa qatysty. Aıaq-qoldarynda týa bitken jáne júre paıda bolǵan aqaýlary bar barlyq balalardyń ishinen bizdiń dárigerler konsılıýmy kómek kórsetilgen alty pasıentti tańdady. Mundaı master-klassty dárigerlerdiń kásibıliginsiz, sondaı - aq bizdiń bas seriktesimiz-"Samruk-Kazyna Trust" áleýmettik jobalardy damytý qorynyń qoldaýynsyz ótkizý múmkin bolmas edi", - dep qorytyndylady "Meıirimdilik" erikti qoǵamy" qoǵamdyq qorynyń dırektory Arýjan Saın.