Áleýmettik jelide tatamı ústinde "Balqadısha" ánin oryndaǵan jasóspirimniń vıdeosy mıllıonnan astam qaralym jınap, kópti tánti etti. Aqshamnews.kz tilshisi jurtty súısintken balanyń ákesimen suhbattasty.
"Sportpen qatar, óner baıqaýlarynan qur qol kelmeıdi"
Kópshilikti daýsymen tánti etken vıdeodaǵy balanyń esimi – Bekbolat Isa İlıasuly. Atyraý qalasy, Almaly aýylynyń týmasy. Isanyń ata-anasy dombyrashylar eken. Ónerli otbasynan shyqqan 14 jastaǵy jetkinshek 2019 jyldan beri dzúdo sportyn janyna serik etken.
«Men de, jubaıym da sporttan alys jandarmyz. Kerisinshe óner adamdarymyz. Ulym Isanyń boıyndaǵy óner bizden daryǵan bolýy kerek. 8 jasynda óziniń qalaýymen dzúdo sportyna bergen bolatynmyn. Sodan beri birneshe jarystarǵa shyǵyp, júldeli oryndar alyp keledi. Al mektepte mýzyka pániniń muǵalimi án baıqaýlaryna da qatystyryp turady. Óner baıqaýlarynan da qur qol kelgen emes» deıdi Isanyń ákesi İlıas myrza.
"Jyly lebiz bildirgenderge kóp raqmet!
İlıas myrza ulynyń ónerine tamsanyp jatqan kópshilikke alǵysyn bildirdi.
«Qazaqta «jigitke jeti óner de az» degen sóz bar ǵoı. Sol sekildi ulymyz qaı saladan bolmasyn úlken jetistikterge jetip jatsa ata-anasy retinde biz árdaıym sózsiz qýanyshty bolamyz. Jelide Isanyń án aıtqan vıdeosyna aq tilekterin arnap jatqan jandarǵa úlken alǵysymdy aıtamyn. Ulym bolashaqta kim bolǵysy keletinin ózi tańdaıdy. Balanyń tańdaýyna qarsy kelmeý kerek. Biz ony árqashan qoldaýǵa ázirmiz» dedi İlıas myrza.
