Qazaqstanda bala týý kórsetkishi rekordtyq deńgeıde tómendep ketken, dep habarlaıdy aqshamnews.kz
Ulttyq statısıka búrosynyń málimetinshe, bıyl qańtar-naýryz aılary aralyǵynda Qazaqstanda bar bolǵany 77,3 myń bala ómirge kelgen. Bul ótken jyldaǵy osy kezeńmen salystyrǵanda 16%-ǵa az, ári 2014 jyldyń İ toqsanynan bergi eń tómengi kórsetkish.
Týý kórsetkishinde maýsymdyq ózgerister baıqalady: jyl saıynǵy eń joǵary kórsetkishter, ádette, úshinshi toqsanda tirkeledi. Ásirese bul qubylys pandemıa jyldary — 2020 jáne 2021 jyldary — erekshe kózge túsken. Al eń tómengi kórsetkishter, kerisinshe, kóbine jyldyń alǵashqy úsh aıyna tán. Soǵan qaramastan, sońǵy 11 jylda tiri týǵan sábıler sany eshqashan 90 myńnan tómen túspegen edi.
2024 jyldyń qańtar-naýryzymen salystyrǵanda týý kórsetkishiniń tómendeýi eldiń barlyq 20 óńirinde baıqalǵan. Bul rette 12 óńirde tómendeý qarqyny ortasha deńgeıden joǵary boldy. Eń úlken tómendeý Aqmola oblysynda (-22%) jáne Jetisý oblysynda (-20,1%) tirkeldi. Qala men aýyl arasyndaǵy aıyrmashylyq ta kózge túsedi: aýyldyq jerlerde kórsetkish -18,1%-ǵa azaısa, qalalarda bul kórsetkish -14,2%-dy qurady.
Halyq sanyna shaqqandaǵy jalpy týý koefısıenti de tómendedi: 2024 jyldyń I toqsanynda bul kórsetkish ár 1000 adamǵa shaqqanda 18,33 bolsa, 2025 jyly 15,39-ǵa deıin azaıdy. Sonymen qatar, týý kórsetkishimen qatar ólim-jitim de azaıyp jatyr. Alaıda bul úrdis baıaý júrýde: qaıtys bolǵandar sany 31 myń adamǵa deıin azaıyp, jyldyq kórsetkish -7,2 paıyz boldy.
Nátıjesinde, tabıǵı ósim — ıaǵnı, týǵandar men qaıtys bolǵandar arasyndaǵy aıyrma — 2025 jyldyń alǵashqy toqsanynda 46,3 myń adam bolyp, 2024 jylmen salystyrǵanda 20,7%-ǵa azaıdy. Bul da 2014 jyldan bergi eń tómengi deńgeı.