El ishinde kózi ashyq, kókiregi oıaý adamdar kóp.
Olar kóp sóıleı bermeıdi. Keıde basyn taýǵa da, tasqa da soǵyp saıa- satty qýyp ketken, usaq-túıekti taqyryp jasap kún kórip júrgen bizdiń jazarmandar sondaı kisilerdiń sózin jalǵannyń jaryǵyna shyǵarsa, halyqqa budan artyq olja bolmas edi. Máselen, birde atyraýlyq Ǵabıt Muqanov degen kisimen dastarhandas boldym. Áńgime kúı, kúıshilik týraly órbidi. Ǵabekeń — qarapaıym ǵana munaıshy qazaq. Saýatty, bilimdi, oı, pikir, usynysy kóp. Áńgime Qurmanǵazyǵa qaraı aýysqanda «Sen «Balbyraýyn» kúıiniń qalaı shyqqanyn bilesiń be?» dedi. Bilmeıtinimdi aıttym. Men bul áńgimege asa sengen joqpyn. Biraq, qısyndy. Braýn degen bir bastyq bolǵan. Sol Qurmanǵazyǵa kúı tartýyn suraıdy. Kúıshi sol zamatynda bir kúı shyǵarady. Sezimtal Braýn kúıdi aıaǵyna deıin tyndaýǵa shydaı almaı «Toqta, mynaý kóteriliske shaqyryp tur ǵoı» deıdi. Keıinnen osy kúı «Braýnnyń baly», ıaǵnı, «Balbyraýyn» atanyp ketken eken. Árıne, kúıdiń tarıhy basqasha bolýy múmkin. Biraq, maǵan álgi qarapaıym qazaqtyń bósteki, bolymsyz áńgimeden góri osyndaı elge kerek áńgimeni aıtqany unady.