Áleýmettik jelilerde balalardy qyzylshaǵa qarsy belgisiz qytaılyq preparatpen májbúrlep egip jatqany týraly aqparat tarady.
Avtordyń paıymdaýynsha, bul koronavırýstyq vaksınasıadan qalǵan ekpe bolýy múmkin. Bul aqparatty QR Densaýlyq saqtaý mınıstrligi joqqa shyǵardy, dep habarlaıdy Almaty-akshamy.kz Stopfake.kz-ke silteme jasap.
«Qazaqstan Respýblıkasynyń Halyq densaýlyǵy jáne densaýlyq saqtaý júıesi týraly kodeksiniń 85-babynyń 4-tarmaǵyna sáıkes, Qazaqstan Respýblıkasynyń aýmaǵynda turaqty bolatyn jeke tulǵalar ınfeksıalyq jáne parazıttik aýrýlarǵa qarsy mindetti profılaktıkalyq ekpelerdi alýǵa mindetti. Sonymen qatar, Kodekstiń 77-babyna sáıkes, egiletin adamnyń ne onyń zańdy ókiliniń profılaktıkalyq ekpelerdi júrgizýge habardar etilgen kelisim berýge nemese olardan bas tartýǵa quqyǵy bar. Elde qyzylshaǵa qarsy vaksınasıa júrgizý úshin «Serum Institute of India» shyǵarǵan qyzylshaǵa, qyzamyqqa jáne parotıtke qarsy aralas vaksına qoldanylady. Bul vaksınanyń óndirisi DDU-nyń qaıta baǵalaýynan ótken, óndiriletin vaksınalardyń sapasy men qaýipsizdigine kepildik beriledi», – delingen Densaýlyq saqtaý mınıstrliginiń habarlamasynda.
Densaýlyq saqtaý mınıstrliginiń ata-analarǵa jasaǵan úndeýinde bylaı delingen: «Eldegi qyzylsha boıynsha qolaısyz epıdemıologıalyq jaǵdaıdy eskere otyryp, balalarda qyzylshaǵa qarsy ekpelerdiń bolýyna nazar aýdarýlaryńyzdy suraımyz». Ekpeni tirkelgen jeri boıynsha medısınalyq uıymǵa júginip, alýǵa bolady.