Prezıdent Qasym-Jomart Toqaev BUU-nyń Ortalyq Azıa ekonomıkalaryna arnalǵan Arnaıy baǵdarlamasyna (SPEKA) qatysýshy memleketter basshylarynyń birinshi samıtinde sóz sóıledi Memleket basshysy, eń aldymen, Samıtti joǵary deńgeıde uıymdastyrǵany úshin Ázerbaıjan Prezıdenti Ilham Álıevke alǵys aıtyp, Ortalyq Azıa elderi basshylary men jıynǵa qatysýshy qurmetti qonaqtarǵa iltıpat bildirdi.
– Qazaqstan 1997 jyly BUU-nyń Ortalyq Azıa ekonomıkalaryna arnalǵan Arnaıy baǵdarlamasyn qurýǵa bastamashy boldy. Qazirgi ýaqytta bul baǵdarlamanyń óńirlik yntymaqtastyqty keńeıtý jáne jahandyq ekonomıkalyq prosesterge qosylý turǵysynan tıimdi platformaǵa aınalǵanyn erekshe atap ótkim keledi. Arnaıy baǵdarlamanyń 25 jyldyǵyna oraı uıymdastyrylyp otyrǵandyqtan, búgingi kezdesýimizdiń sımvoldyq máni zor. Byltyr Qazaqstannyń tóraǵalyǵy aıasynda biz Baǵdarlamanyń negizgi baǵyttary jónindegi yqpaldastyqty nyǵaıtyp, ony júzege asyrý úshin mańyzdy sharalar qabyldadyq, – dedi Qasym-Jomart Toqaev.
Prezıdenttiń aıtýynsha, Qazaqstan SPEKA-ny damytýǵa, sondaı-aq Ortalyq Azıa men Kavkaz óńiriniń yntymaqtastyǵyn nyǵaıtýǵa Ázerbaıjan Respýblıkasynyń qosqan úlesin joǵary baǵalaıdy. SPEKA-ǵa qatysýshy memleketter basshylarynyń búgingi tarıhı ári tuńǵysh samıti atqarylǵan aýqymdy jumystyń túıini bolmaq.
– Búgingi kezdesý nátıjesinde bizdiń ashyqtyq, ózara qurmet pen senim qaǵıdattaryna negizdelgen kópjaqty yntymaqtastyǵymyzdyń kókjıegi keńeıetinine senimdimin. Geosaıası turǵyda bólshektený beleń alyp, jahandyq ekonomıkanyń konúnktýrasy qubylyp turǵan qazirgi jaǵdaıda Arnaıy baǵdarlamanyń mán-mańyzy arta túsedi. Ortaq múddeni eskere otyryp, SPEKA-ny odan ári damytý jóninde óz kózqarasymdy ortaǵa salýǵa ruqsat etińizder. Ornyqty damý qaǵıdattary memleketterimizdiń ulttyq strategıalary men baǵdarlamalarynyń ózegine aınaldy. Búginde Qazaqstanda memlekettik búdjettiń 80 paıyzy ornyqty damý maqsattaryna sáıkestendirildi. Úkimetimizdiń eń basty mindeti – sapaly bilim berý men densaýlyq saqtaý isiniń barshaǵa qol jetimdi bolýyn qamtamasyz etý. Jýyrda kúshine engen jańa Áleýmettik kodekste áleýmettik osal toptarǵa jatatyn azamattardy qorǵaý tetikteri jetildirildi, – dedi Prezıdent.