Senat otyrysynda «Qazaqstan Respýblıkasynyń keıbir zańnamalyq aktilerge baılanys, sıfrlandyrý, ınvestısıalyq ahýaldy jaqsartý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» zań maquldandy, dep habarlaıdy almaty-akshamy.kz.
Senat depýtaty Baýyrjan Qanıevtiń sózinshe, zań aıasyndaǵy birqatar túzetý memleket basshysynyń tapsyrmalaryn oryndaýǵa baǵyttalǵan. Zańmen Qazaqstan Respýblıkasynyń 38 zańnamalyq aktisine, onyń ishinde 9 kodeks pen 29 zańǵa ózgerister men túzetýler engizilgen.
Atap aıtqanda:
- baılanys operatorlarynyń baılanys ınfraqurylymyna teń qoljetimdiligin qamtamasyz etý;
- eldi mekenderdiń bas josparlary men egjeı-tegjeıli josparlaý jobalary sheńberinde baılanys jelilerin ornalastyrý oryndaryn aıqyndaý;
- aýyl sharýashylyǵy jáne ónerkásip obektilerinde sıfrlandyrý kezinde shyǵystardyń bir bóligin óteý boıynsha baılanys qyzmetterin sýbsıdıalaý;
- jańa týǵan nárestelerdiń derbes derekterin joǵaltý táýekelderin boldyrmaý maqsatynda bala týǵannan keıin birden jeke sáıkestendirý nómirlerin berý;
- baılanys operatorlarynyń múgedektigi bar adamdarǵa jeńildikti tarıfter berý jónindegi qosymsha mindettemelerin belgileý;
- alaıaqtyq belgileri bar tólem tranzaksıalary boıynsha derekter almasý úshin antıfrod-ortalyqtyń quqyqtyq mártebesi men fýnksıalaryn bekitý jáne taǵy basqa bólikterinde ózgerister men tolyqtyrýlar engizý kózdeledi.
Jer qoınaýyn paıdalanýshylardyń kelisimsharttar talaptaryn saqtaýyn baqylaý úshin qajet ǵaryshtyq monıtorıń júıesi arqyly orman qoryn qorǵaý, saqtaý, paıdalaný, ormandardy molyqtyrý jáne orman ósirý salasyndaǵy zańnamanyń buzylýy týraly aqparat alý da zańnyń aıasynda qarastyrylǵan. Qajetti ınfraqurylym qurylysyn jáne shuǵyl qyzmetterdiń jumysyn jedeldetý maqsatynda oblystyń, respýblıkalyq mańyzy bar qalanyń, astananyń ákimdikterine búdjet qarajaty esebinen telekomýnıkasıa jelileri men kabeldik kárizderdi túgendeý boıynsha quzyret beriletin bolady, - dedi Baýyrjan Qanıev.
Onyń aıtýynsha, zań maquldanǵan soń, birinshiden, baılanys jelileriniń qurylysy jedeldetiledi. Ekinshiden, baılanys qyzmetteriniń sapasy jaqsarady, qamtý aımaqtary keńeıedi, abonentter sany artady. Úshinshiden, baılanys operatorlary arasynda básekelestik damıdy. Tórtinshiden, jańa spýtnıktik baılanys jumys isteı bastaıdy, besinshiden, ınvestısıalyq ahýal jaqsaryp, ekonomıkadaǵy ınovasıalardyń úlesi artady.