15 mamyr kúni AQSH prezıdenti Donald Tramp Taıaý Shyǵysqa sapary aıasynda Birikken Arab Ámirlikterine bardy. Tramptyń ushaǵy Abý-Dabıge qonyp, ony BAÁ prezıdenti sheıh Muhammed ben Zaıd Ál Nahaıan qarsy aldy. AQSH prezıdentin áýejaıda dástúrli "halıdjı" bıimen qarsy alǵan qyzdardyń óneri jelide qyzý talqylanyp jatyr. Olardyń uzyn shashtaryn shaıqap bıleýi – kórgen jandy tańǵaldyrmaı qoımaıdy. Aqshamnews.kz tilshisi erekshe bıdiń qaıdan shyqqanyn tarqatady.
"Halıdjı" - qandaı bı?
"Halıdjı" sózi arab tilinen aýdarǵanda "shyǵanaq" degen maǵyna beredi. Bul bı – Arab túbegindegi Parsy shyǵanaǵy elderine ortaq mádenı mura. Naqtyraq aıtsaq, Saýd Arabıasy, Kýveıt, BAÁ, Bahreın, Oman, Katar syndy elderdiń ulttyq dástúrine engen bı túri.
Shashpen bıleýdiń ereksheligi
Bul bıdiń ereksheligi – shash qımyldaryna negizdelýi. Bıshi qyzdar uzyn shashtaryn terbep, shaıqap, ár túrli baǵytqa ıip, ózine tán órnekpen bıleıdi. Bul qımyldar náziktik pen ishki qýatty beıneleıdi. Shash – áıeldiń sulýlyǵy men erkindiginiń sımvoly retinde qarastyrylady.
sýret: ashyq derekkóz
Qaı kezde oryndalady?
"Halıdjı" bıi tek resmı kezdesýlerde ǵana emes, úılený toılarynda, merekelerde, qyz-kelinshekterdiń jınalystarynda da oryndalady. Bul – tek bı emes, arab mádenıetiniń názik kody, dástúrge degen qurmettiń kórinisi.
Trampqa áseri qandaı boldy?
Jeli qoldanýshylarynyń aıtýynsha, Tramp bul dástúrli bıdi jyly qabyldaǵan. Álemdik saıasat sahnasynyń tulǵasy úshin bul erekshe qarsy alý sáti ári shyǵys mádenıetiniń aıqyn kórinisi boldy.
Tramp aldaǵy kúnderi Abý-Dabıdegi sheıh Zaıd meshitine barady jáne «Qasr ál-Vatan» prezıdenttik saraıynda resmı qabyldaýda bolady. 16 mamyr kúni de Amerıka prezıdentiniń qatysýymen BAÁ-de birqatar is-sharalar ótedi dep josparlanyp otyr.