2024–2025 jyldardyń qyrkúıek–sáýir aılary aralyǵynda astyq pen unnyń astyq balamasyndaǵy eksporty shamamen 10 mln tonnaǵa jetip, ótken maýsymmen salystyrǵanda 37,4%-ǵa ósti.
Jyl saıynǵy jóneltilim kólemi orta eseppen 7–8 mln tonnany quraıdy, dep habarlaıdy aqshamnews.kz.
Ótken jyly dıqandar rekordtyq ónim jınap, bul eksport múmkindikterin aıtarlyqtaı arttyrdy: Qazaqstan jyl sońyna deıin shetelge 12 mln tonnaǵa deıin astyq jónelte alady.
Aýyl sharýashylyǵy vıse-mınıstri Azat Sultanovtyń aıtýynsha, osy maýsymdaǵy basty jetistik – dástúrli emes naryqtarǵa shyǵý arqyly eksport geografıasynyń keńeıýi.
«Astyqtyń mol ónimdiligi, AÓK salasyna memlekettik qoldaýdyń keshendi sharalary men aýyl sharýashylyǵy ónimin óndirýshilerdiń belsendiligi jańa eksporttyq baǵyttardyń ashylýyna serpin berdi. Bes jyldyq úzilisten keıin Qazaqstan Ázerbaıjan, Grýzıa jáne Túrkıaǵa astyq jóneltýdi qaıta bastady. Qatty bıdaıdy Italıaǵa jóneltý kólemi artyp keledi. Búginde Qazaqstan Belgıa, Polsha, Portýgalıa, Norvegıa, Ulybrıtanıa sıaqty biz úshin buryn-sońdy bolmaǵan eýropalyq naryqtarǵa eksportty jolǵa qoıyp jatyr. Marokko men BAÁ elderi de bizdiń astyǵymyzǵa qyzyǵýshylyq tanytýda», – dedi Azat Sultanov.
Mamyr aıynyń sońyna deıin Azyq-túlik kelisimshart korporasıasy Marokkoǵa alǵashqy 60 myń tonna bıdaı jóneltýdi aıaqtaıdy. Sonymen qatar, Vetnamǵa 15 myń tonna kóleminde synamalyq partıa jetkizýge kelisimshart jasaldy.
Al dástúrli naryqtarǵa keler bolsaq, bul baǵytta da eksport aıtarlyqtaı jandandy. 2024–2025 jyldyń qyrkúıek–sáýir aılarynda Ortalyq Azıa elderi, Aýǵanstan, Túrkıa jáne Qytaı astyq pen undy (astyq balamasynda) ımporttaýdy ótken jylǵy osy kezeńmen salystyrǵanda edáýir arttyrdy: Ózbekstan – 2,6 mln tonnadan 3,3 mln tonnaǵa deıin (+28%), Tájikstan – 807,4 myń tonnadan 1,2 mln tonnaǵa deıin (+44%), Qyrǵyzstan – 116,6 myń tonnadan 278,1 myń tonnaǵa deıin (2,4 ese ósken), Iran – 54 myń tonnadan 889 myń tonnaǵa deıin (16 ese ósken), Ázerbaıjan – 5 myń tonnadan 569 myń tonnaǵa deıin (113 ese ósken), Aýǵanstan – 202 myń tonnadan 270 myń tonnaǵa deıin (+34%).
Sońǵy bes jylda alǵash ret Qazaqstan Iran men Ázerbaıjanǵa astyq jóneltýdi qaıta jandandyryp, jetkizý kólemin birneshe esege arttyrdy.
Qytaı tarapynan ósimdik sharýashylyǵy ónimderine erekshe qyzyǵýshylyq baıqalýda. Óz óndirisiniń ósýine qaramastan, kórshiles elde qazaqstandyq jemdik unǵa degen turaqty suranys saqtalyp otyr. Bul astyq óndirýshiler úshin qosymsha múmkindik beredi.
2024–2025 jyldyń qyrkúıek–sáýir aılarynda Qytaıǵa 1,8 mln tonna astyq pen un (astyq balamasynda) eksporttaldy, bul ótken maýsymnyń osy kezeńimen salystyrǵanda 27%-ǵa artyq.
Astyq eksportynyń artýy memlekettik qoldaý sharalarynyń tıimdiligin ǵana emes, sonymen qatar halyqaralyq seriktesterdiń qazaqstandyq ónim sapasyna degen senimin de kórsetedi.
Qazirgi jaǵdaılarda jańa naryqtarǵa shyǵý ıkemdilikti, balama logıstıka qurýdy jáne otandyq AÓK-tiń básekege qabilettiligin turaqty arttyrýdy talap etedi.