Almatyda "omıkron" shtamynyń taralýymen koronavırýs ınfeksıasy dertiniń óskeni baıqalady.
Osyǵan baılanysty qala ákimi jumys sapary barysynda ınfeksıalyq stasıonarlardyń qosymsha tósek-oryndardy ornalastyrýǵa daıyndyǵyn tekserdi, dep habarlaıdy Almaty-akshamy.kz
Baqytjan Saǵyntaev RV-90 I.Jekenova atyndaǵy Juqpaly aýrýlar aýrýhanasynyń fılıalyna bardy. Búginde munda KVI-men aýyratyn 199 pasıent bar, onyń ishinde 21-i JITB-te. Stasıonardyń jalpy qýaty – 500 tósek, onyń ishinde 45 tósek reanımasıa jáne qarqyndy terapıa bólimshesinde.
Qala ákimi sondaı-aq №№ 12 jáne 7 qalalyq klınıkalyq aýrýhanalarda KVI juqtyrǵan naýqastardy qabyldaýǵa daıyndyqpen tanysty. Bas dárigerler kovıd bólimsheleriniń jumysy jalpy medısınalyq kómek kórsetýmen qatar júrgiziletinin habarlady
20 qańtardaǵy jaǵdaı boıynsha, Almatyda koronavırýstyq ınfeksıanyń 2 057 jaǵdaıy tirkelgen, onyń ishinde 1 866 sımptomdy jaǵdaı. Infeksıalyq stasıonarlarda 1 350 pasıent, onyń ishinde 187 bala bar. JITB-te – 71 naýqas.
Jalpy, kovıdtik stasıonarlardyń qýaty 9 340 tósek-oryndy quraıdy, onyń ishinde 730 reanımasıalyq. Búginde 3 310 oryn qoldanysta, rezervte 6 030 oryn bar.
B. Saǵyntaevqa OQKA bazasynda ashylǵan telemedısına ortalyǵynyń jumysy týraly baıandaldy. TMO mamandarynyń baqylaýynda 10 188 pasıent bar. Bul san aǵymdaǵy jyldyń 1-20 qańtar aralyǵynda 20 ese ósti. Ortasha alǵanda, pasıentterge shamamen 5 myń qońyraý shalynady. 20 qańtarda 8 458 qońyraý soǵyldy, onyń barysynda naýqastyń jaǵdaıy suralyp, KVI emdeý boıynsha usynymdar beriledi.
Qala ákimi sondaı-aq №7 aýrýhana bazasynda ornalasqan KVI-ǵa qarsy vaksınalardyń qalalyq qoımasyna bardy. Qoımadaǵy jáne egý pýnktterindegi I jáne II komponentti vaksınalardyń qaldyǵy «Sınofarm» vaksınasynyń 207 733 dozasyn, «KazVak» vaksınasynyń 176 349 dozasyn, Pfizer 254 782 dozasyn quraıdy. B. Saǵyntaev halyqty KVI-ge qarsy ekpe alýǵa, sondaı-aq revaksınasıadan ótýge shaqyrdy.
Ótken táýlikte birinshi komponentpen 2 218 adam, ekinshisimen 1 978 adam vaksınalandy. 2021 jyldyń 1 aqpanynan bastap I komponentpen 1 095 040 adam, II komponentpen 1 042 772 adam egildi. Egilgenderdiń arasynda 60 jastan asqandar 123 885 adamdy quraıdy. Pfizer (Comirnaty) vaksınasyn 35 909 adam aldy, onyń ishinde 1 953 júkti, 7 652 bala emizetin áıel jáne 26 304 bala men jasóspirim bar.
Sol kúni B. Saǵyntaev KVI taralýyna qarsy is-qımyl jónindegi shtab otyrysyn ótkizdi. Kovıdtik stasıonarlardyń bas dárigerleri pasıentterdi qabyldaý jáne emdeý dınamıkasy týraly baıandady. Balalar men júkti áıelderdi emdeýge erekshe kóńil bólinedi. 1-20 qańtar aralyǵynda qalalyq balalar juqpaly aýrýlar aýrýhanasyna KVI bar 346 bala tústi. Infeksıalyq bólimshelerde 102 júkti áıel bar.
Qala ákimi AMSK-tiń, Telemedısına ortalyǵynyń jumysyn kúsheıtýdi jáne rezervtik tósek-oryndardy ornalastyrýǵa daıyndyqty qamtamasyz etýdi tapsyrdy. Budan basqa, sanıtarlyq-epıdemıologıalyq qaýipsizdik jónindegi sharalardy jalǵastyrý, sondaı-aq halyqty vaksınasıalaý men revaksınasıalaýdy jandandyrý qajet. B. Saǵyntaev ujymdyq ımýnıtetti qalyptastyrý pandemıanyń kezekti tolqynyna qarsy turýdyń birden-bir senimdi ádisi bolyp tabylatynyn atap ótti.