Jótel kóbine sýyq tıgizip alǵannan paıda bolady, al keıde ol bronhıt nemese pnevmonıanyń belgisi bolýy múmkin. Qalaı bolǵanda da, onymen múmkindiginshe tezirek kúresý kerek. Qazir úlken-kishige qaramaı, jótel tamaqtan alyp turǵan kezde, bizdiń keńesimiz paıdańyzǵa jarasyn.
Jóteldi emdeýdi keshendi túrde jasaý kerek. Jótelden dárigerdiń jazyp bergen dári-dármekterin iship, sondaı-aq halyq emine júginý arqyly emdelýge bolady.
Tamaqtyń jybyrlaýynan bastalyp, jutyndyrmaı aýyrtatyn, ári qaraı odan da asqynatyn jótel, ásirese, qys mezgilinde biraz adamnyń mazasyn alady. Kóbinese jótel adamdy jatqan kezinde jıi mazalaıdy, túnde uıyqtaýǵa múmkindik bermeıdi, osynyń kesirinen adam tolyǵymen tynyǵa almaı, sharshap oıanady.
Aýrý sımptomy 1-2 kúnde ótip ketýi múmkin nemese uzaq ketpeıtin kezi de bolady. Úı jaǵdaıynda jóteldi emdeýge bola ma? Ózińizge zıan keltirmeý úshin qandaı erejelerdi saqtaý kerek?
Eń aldymen, munyń jeke aýrý emes, tek sımptom ekenin atap ótken jón, sondyqtan dárigerge barý qajet. Ásirese, adamnyń qandaı da bir sozylmaly aýrýlary bolsa, asqynyp ketýi múmkin.
Degenmen, siz dástúrli medısınaǵa senseńiz, onyń halyq emin dárihana quraldarymen salystyrýdyń, sondaı-aq dáriger taǵaıyndaǵandardan bas tartýdyń qajeti joq. Halyq emi qosymsha paıdasyn tıgizedi, biraq keıde emdeý turǵysynan baıaý áreket etedi. Keıbir qoldan jasalatyn emge birneshe kún boıy daıyndalý kerek, al aýyryp turǵan organızmge árbir mınýt mańyzdy. Sondaı-aq, úı resepteri aýrýdyń alǵashqy belgilerinde ǵana kómektesedi, óıtkeni olar asqynyp ketken jaǵdaılardy jeńe almaıdy, tipti, bul jaǵdaıda ózin-ózi emdeý qaýipti bolýy múmkin.
Sondaı-aq, kez kelgen shóp, gúl, halyqtyq ónim alergıa týdyrýy múmkin ekenin este ustaǵan jón. Olardy qabyldamas buryn, sizde alergıa joq ekenine kóz jetkizý kerek.
Qurǵaq jótelge qarsy halyq emi
Bul jaǵdaıda negizgi mindet - qaqyryqty shyǵarý. Tómendegi tizimdelgen barlyq osy ósimdikter osyǵan kómektesedi.
Joljelken
1 as qasyq qurǵaq joljelken japyraqtaryn bir staqan qaınaǵan sýǵa aralastyryńyz. Ony 2 saǵat tyndyry, súzip alyńyz. Tamaqtanýdan 20 mınýt buryn kúnine 4 ret 1 as qasyqtan ishińiz.
Shalǵam
Bul - jótelge qarsy óte tıimdi áser etetin kókónis. Shalǵamdy ár túrli ónimdermen birge qoldanýǵa bolady. Mysaly, sábiz shyryny men bal qosylǵan shalǵam shyryny. Nemese jaı ǵana balǵa aralstyryńyz. Saǵat saıyn 1 as qasyqtan ishińiz. Biraq eń jıi qoldanylatyn ádis - bul bal qosylǵan shalǵam sıropy (kókónisti oıyp, ishinde oıyqqa bal quıylady jáne sıroptyń shyǵýyn kútedi), muny da 1 as qasyqtan qoldanyńyz.
Ógeıshóp japyraqtary
Bul ósimdikti dárihanada satylatyn jótelge qarsy preparattardyń quramyna qosady. Ony shaı retinde demdep ishýge nemese tunba jasaýǵa bolady - qurǵaq japyraqtarǵa sý quıyńyz, 15 mınýt qaınatyńyz. Tamaqtanýdan jarty saǵat buryn 1 as qasyqtan iship otyryńyz (kúnine 6 retke deıin).
Mıa tamyry
1 as qasyq týralǵan tamyrdy bir staqan qaınaǵan sý quıyp, qaınatyńyz. Sodan keıin ony 2-3 saǵat tyndyryńyz. Kúnine 4-5 ret as qasyqtan qoldanýǵa bolady.
Zimbir tamyry
Odan tunba jasaýǵa bolady (usaq úkkishten ótkizip, qaınaǵan sýǵa salyp, basqa shópterdi de qosýǵa bolady, jarty saǵatqa qaldyryńyz, sodan keıin dámine qaraı bal qosýǵa bolady). Ony 1 as qasyqtan kúnine 3 ret ishińiz.