Jambyl oblysynda aýyl ákimderiniń 60 paıyzdan astamy jańardy, dep habarlaıdy almaty-akshamy.kz inform.kz silteme jasap.
Memleket basshysy Qasym-Jomart Toqaevtyń bastamasymen Qazaqstanda alǵash ret 25 shilde kúni aýyl ákimderiniń saılaýy ótken bolatyn.
Aýyl ákimderin tikeleı saılaý naýqanynda Jambyl oblysyndaǵy 38 aýyldyq okrýg boıynsha 122 kandıdat usynylyp, onyń ishinde 111 úmitker tirkeldi. Ótken saılaý nátıjesinde tikeleı daýys berý arqyly 38 aýyl ákimi saılandy, olardyń 63,2 paıyzy jańardy.
Onyń úsheýi - áıel ákimder. Máselen, Jýaly aýdany Karasaz aýyldyq okrýgine saılanǵan Janar Nurmuratqyzy buǵan deıin atalǵan eldi mekendegi ákimdiktiń is-júrgizý jáne esep bóliminiń basshysy bolyp jumys istep, merıtokratıa qaǵıdasy arqyly qyzmette joǵarylap, aýyl ákimi bolyp saılandy.
Jalpy ákimderdiń ortasha jasy – 43, buǵan deıingi kórsetkish – 54 jas bolatyn, ıaǵnı, aýyl ákimderiniń jańa býyny 11 jasqa jasaryp otyr. Eń jas ákim - Rysqulov aýdany Jańaturmys aýylyna saılanǵan 28 jastaǵy Qýandyq Ersaıyn osyǵan deıin aýdan ákimdiginde personaldy basqarý bóliminiń basshysy bolyp qyzmet etken.
Barlyq partıa ókilderine, ózin-ózi usynǵandarǵa teń jaǵdaı jasaldy. Ákim laýazymyna taǵaıyndalǵandardyń 31-i «Nur Otan» partıasynan, «Aýyl», «Adal», «Aq jol», «Qazaqstannyń Halyqtyq partıasy» partıalarynan bir kandıdattan jeńiske jetti. Ózin-ózi usynǵandardyń ishinen 3 adam endi aýyl ákimi laýazymynda jumys isteıtin bolady.
Taǵy da aıta keterligi, óńirdegi jańa ákimderdiń 31 paıyzynyń mamandyǵy ekonomıs, 24 paıyzy - muǵalim, 13 paıyzy - ınjener, 11 paıyzy - aýyl sharýashylyǵy mamany, 5 paıyzy - zańger, 16 paıyzy - ózge mamandyq ıeleri.
Jambyldyqtar Prezıdenttiń bul jańashyl reformasyna tolyqtaı qoldaý kórsetip, saılaýǵa belsendi qatysty. Óńirdegi 89 saılaý ýchaskesinde 94 642 adam, ıaǵnı saılaýshylardyń 90 paıyzy qatysty.