Almaty áýejaıynda qarýly adamdy zalalsyzdandyrǵan er adamnyń kim ekeni belgili boldy, dep habarlaıdy Orda.kz.
Kepilge alynǵan qyzdyń ornyna ózin usynǵan er adamnyń – 1973 jyly týǵan Musa Ábdiraıym ekeni belgili boldy, Orda.kz tilshisi búgingi kúnniń batyrymen suhbattasty.
Ashýǵa mingen er adam tekserý qyzmetkeriniń shashynan ustap, pyshaqpen qorqytqan. Kýágerler abdyrap qalǵan sátte, 52 jastaǵy Musa Ábdiraıym jaǵdaıdy óz qolyna aldy. Buryn sportpen aınalysqan ol taı boksy jáne jekpe-jektiń basqa túrlerin meńgergen eken.
«Men jaı ǵana tanysymdy shyǵaryp salyp turdym. Qyzǵa shabýyl jasaǵanyn kórdim. Ózim úshin emes, tek qyz úshin qoryqtym», – dedi ol.
Ábdiraıym birden ózin kepilge alýdy usynyp, artynsha shabýyldaýshyǵa qarsy shyǵyp, onyń qolyndaǵy pyshaqty tartyp alyp, jerge qulatqan.
Shabýyldan zardap shekken qyz qatty kúızeliste boldy, alaıda ol Musaǵa alǵys aıtty.
«Polıseıler de qońyraý shalyp, alǵystaryn bildirip jatyr. Telefonym tynymsyz shyryldap jatyr», – deıdi ol kúlimsirep.
Ábdiraıym mundaı jaǵdaıǵa birinshi ret tap bolǵanyn aıtyp, barlyǵynyń aman qalǵanyna qýanyshty ekenin jetkizdi.