Halyqaralyq áıelder kúnine oraı Almatyda aýqymdy konsert ótti. Bir sahnada aty ańyzǵa aınalǵan jáne qazirgi zamanǵy oryndaýshylar, sondaı-aq sheteldik juldyzdar óner kórsetti. Merekelik baǵdarlama aıasynda tanymal ánder, klasıkalyq shyǵarmalar jáne erekshe mýzykalyq kollaborasıalar oryndaldy, dep habarlaıdy aqshamnews.kz
Konsertke Almaty qalasynyń ákimi Erbolat Dosaev qatysty. Qurmetti qonaqtardyń qatarynda kópbalaly analar, eńbek ardagerleri, ǵalymdar, ustazdar, mádenıet, medısına, sport jáne basqa da salada eńbegi sińgen jáne qyzmet etetin áıel azamatshalar boldy.
Konsert áıgili «Dos-Muqasan» ansambli men «ALPHA» tobynyń jańasha oryndaýyndaǵy
«16 qyz» ánimen bastaldy. Bul qoıylym mýzykadaǵy urpaqtar sabaqtastyǵynyń sımvolyna aınaldy.
Romantıkalyq kóńil-kúıdi Araı men Rústem Nurjigit jalǵastyryp, «Gavan moeı lúbvı» atty lırıkalyq kompozısıany oryndady. Odan keıin sahnaǵa Qazaqstannyń halyq artısi, belgili pıanıs Jánıa Áýbákirova shyǵyp, Frederık Shopenniń «Váls №7» shyǵarmasyn usyndy. Keıin ol Erlan Kókeevpen birge «Tanes pod dojdem» kompozısıasyn oryndady. Klasıkalyq áýen men áserli vokal ádemi úılesim taýyp, kórermenderge erekshe atmosfera syılady.
Keıin sahnada Maqpal Isabekova «Aıala meni» ánin, Kyle Ruh náziktik pen sımvolızmge toly «Aq Qusym» kompozısıasyn oryndady.Al Tolqyn Zabırova, 2RAR, sondaı-aq «Arnaý» tobynyń burynǵy solıseri Nurjan Kermenbaev pen Saltanat Baqaeva «Egiz lebiz» ánin oryndap, kórermenderdi áýezdiligimen jáne emosıalyq tereńdigimen baýrap aldy.
Keshtiń áserli sátteriniń biri – Dinaya-nyń «Mama» ánin oryndaýy boldy. Bul ýaqytta ekranda analar men balalardyń beınekadrlary kórsetilip, kórermenderge erekshe áser syılady. Mona Songz «Sen» ániniń jańa nusqasyn usynyp, ony ózgeshe áýen men emosıalarǵa baıytty. Odan keıin Nurǵalym Amanbaı «Súıem men» kompozısıasymen zaldy meıirim men jylýlyqqa bóledi.
Kópshiliktiń súıikti toby JCS «Moı dom» jáne «Ia lúblú tebá» ánderin oryndap, fılosofıalyq máni bar tereń sezimderdi jetkizdi. Al RaiM eki án usyndy: júrekti eljiretken «Janym-aý, sen» jáne kóńildi «Dıskoteka ız 90-h».
Konserttiń fınaldyq akordy – Made in KZ tobynyń oryndaýyndaǵy «Ana týraly jyr» kompozısıasy boldy. Bul án keshtiń jarqyn qorytyndysyna aınalyp, analarǵa degen alǵys pen mahabbatty bildirdi.
Konsertke erekshe atmosfera syılaǵan taǵy bir element – túrli kásip ókilderiniń beınequttyqtaýlary. Polıseıler, áskerı qyzmetkerler, órt sóndirýshiler, qurylysshylar men sportshylar áıelderge degen alǵysyn bildirip, jyly lebizin jetkizdi.
Bul is-shara mýzykalyq kesh ǵana emes, sonymen qatar Almatynyń damýyna eńbegi sińgen áıelderge degen qurmet belgisi boldy.