Keshe, 6 naýryzda, QR Parlamenti Májilisiniń Tóraǵasy Erlan Qoshanov pen QR Mádenıet jáne aqparat mınıstri Aıda Balaeva «AMANAT» partıasynyń Áıelder qanaty ókilderimen kezdesti.
Halyqaralyq áıelder kúnine oraı Májiliste ótken is-shara genderlik teńdik, áıelderdiń qoǵamdaǵy róli men olardyń memlekettik basqarý isine qatysýy máselelerine arnaldy, dep habarlaıdy aqshamnews.kz.
Mınıstr óz sózinde Qazaqstanda áıelderdiń ózin-ózi damytýyna jáne eldiń damýyna úles qosýyna múmkindik beretin júıeli sharalar júzege asyrylyp jatqanyn atap ótti.
Kezdesý barysynda memlekettik qyzmettegi áıelderdiń basshylyq laýazymdarda az qamtylýy máselesi de qozǵaldy.
Mınıstr memlekettik qyzmetshilerdiń 56%-ǵa jýyǵy áıelder bolǵanymen, olardyń basshylyq laýazymdardaǵy úlesi 40%-dan tómen ekenin atap ótti.
Sondaı-aq, Aıda Balaeva qazirgi tańda elimizde oblystar men respýblıkalyq mańyzy bar qalalar ákimderiniń orynbasary qyzmetin nebári toǵyz áıel atqaryp otyrǵanyn aıtty. Mınıstrlikterdegi jaǵdaı da uqsas – 21 mınıstrliktiń ishinde vıse-mınıstr qyzmetin bar bolǵany segiz áıel atqarady, bul ortalyq jáne jergilikti atqarýshy organdardaǵy negizgi laýazymdardyń nebári 7-10%-yn quraıdy.
Vedomstvo basshysy ásirese tájirıbesi mol departament dırektorlary men komıtet tóraǵalaryn ortalyq jáne jergilikti atqarýshy organdardaǵy negizgi laýazymdarǵa joǵarylatý mańyzdy ekenin erekshe atap ótti.
Mınıstrdiń pikirinshe, kadrlardy irikteýge júıeli túrde qaraý qajet jáne kásibı ári mansaptyq ósýge laıyqty mamandardy maqsatty túrde anyqtaý kerek.
«Ulttyq komısıa «Amanat» partıasynyń áıelder qanatymen birlesip, memlekettik qyzmettegi áıelderdiń sapalyq quramyna tereń taldaý júrgizip, olardy memlekettik qyzmette joǵarylatýǵa qatysty usynymdar ázirleýdi usynamyn. Men statısıkalyq kórsetkish úshin jasandy túrde joǵarylatýǵa qarsymyn. Kerisinshe, bul mehanızm tájirıbesine, bedeline, kásibı quzyrettiligi men jeke qasıetterine saı eń úzdikterdi anyqtaýǵa múmkindik beredi», – dedi mınıstr.
Sonymen qatar, Aıda Balaeva áıelderge arnalǵan keńes berý ortalyqtaryn qurýdy usyndy.
«Taǵy bir mańyzdy másele – áıelderge arnalǵan biryńǵaı konsýltasıalyq ortalyqtyń bolmaýy. Iá, búginde turmystyq zorlyq-zombylyqqa ushyraǵan nemese qıyn jaǵdaıǵa tap bolǵan áıelderge kómek kórsetetin ortalyqtar bar. Alaıda, memlekettik qyzmetke nemese kvazımemlekettik sektorǵa qalaı ornalasýǵa bolatynyn túsindiretin arnaıy ortalyqtar joq. Sondyqtan, qoǵamdyq qabyldaý bólimderiniń áleýetin paıdalana otyryp, olardyń janynan jumysqa ornalasý tártibi men basqa da mańyzdy máseleler boıynsha keńes beretin arnaıy kabınetter ashýdy usynamyn», – dedi Aıda Balaeva.
Mınıstr memlekettik qyzmetshiniń basty mısıasy – óz qyzmettik mindetterin jaýapkershilikpen ári adal oryndaý ekenin atap ótti.
«Memlekettik qyzmettiń barlyq satylarynan ótken adam retinde aıtarym, ómirińdi memleketke qyzmet etýge arnaý – bul temirdeı tártip, joǵary jaýapkershilik jáne bar kúsh-jigerińdi sarp etý degen sóz. Bul – úlken mártebe. Memlekettik múddeni joǵary qoıyp, óz ýaqytyń men otbasyńnyń múddesinen bas tartýǵa daıyn bolýdy talap etedi. Óz kásibińdi sheksiz súıý – bul joldyń basty sharty. Sondyqtan bul joldy sanaly túrde tańdaý qajet», – dep qorytyndylady Mádenıet jáne aqparat mınıstri.