Atyraý turǵyny 1892 jylǵy vıntovka men soǵys kezinde shyqqan tapanshany polısıaǵa tapsyrdy. Oblysta 25 sáýirden beri atys qarýlaryn, oq-dári, jarylǵysh zattardy satyp alý aksıasy ótip jatyr, dep habarlaıdy Almaty-akshamy.kz QazAqparat-qa silteme jasap.
«Aksıa maqsaty – qarýlarmen jasalatyn qylmystardyń aldyn alyp, qoǵamdyq qaýipsizdikti qamtamasyz etý. Onyń aıasynda Qurmanǵazy aýdandyq polısıa bólimine 8 adam erikti túrde zańsyz saqtalǵan 9 atys qarýyn syıaqy alý úshin tapsyrdy. Onyń ishinde 1892 jyly shyǵarylǵan «Mosına» markaly vıntovkasy bar. Al, «Shpagın» pýlemet tapanshasy 1944 jyly zaýyttan shyǵarylǵany anyqtalyp otyr. Mundaı eski qarýlardy atalardan qalǵan kóz retinde saqtap, keıingi urpaqqa muraǵa qaldyrýdy kózdeıtinder bar. Alaıda, bul - qarýdy zańsyz saqtaý joly ekenin umytpaý kerek. Zańsyz saqtalǵan atys qarýlar men oq-dárilerdi ishki ister organdaryna óz erkimen tapsyrǵan azamattar qylmystyq, ákimshilik jaýapkershilikke tartylmaıdy», - dep habarlady departamenttiń baspasóz qyzmeti.
Osy oraıda, polısıa qyzmetkerleri adam ómirine qaýip tóndirý, zaqymdaný nemese jaraqattanýdy boldyrmaý úshin kezdeısoq tabylǵan jarylǵysh zattardy ózdiginen tasymaldamaı, «102» telefony arqyly habarlaý qajettigin qaperge beredi. Eske sala ketelik, budan buryn Atyraýda polıseıler zańsyz saqtalǵan 3 qarýdy tárkilegen.