Uńǵymalardy joıý ózekti máselege aınalǵan
Bıyl Atyraý oblysynda 60 gıdrogeologıalyq uńǵyma joıylady, dep habarlaıdy Almaty-akshamy.kz QazAqparat-qa silteme jasap.
Oblystyq tabıǵı resýrstar jáne tabıǵat paıdalanýdy retteý basqarmasynyń basshysy Nurlan Jantoqovtyń aıtýynsha, Jylyoı aýdanynyń aýmaǵyndaǵy 60 gıdrogeologıalyq uńǵymany joıý kózdelip otyr.
«Ózdiginen aǵatyn gıdrogeologıalyq uńǵymalar jer astyndaǵy tushshy sýdyń tabıǵı resýrsyna, qorshaǵan ortaǵa zıan keltiredi. Jerasty jáne jerústi sýlaryn fenoldarmen, radıoaktıvti jáne ýly elementtermen lastaıdy. Osyǵan baılanysty byltyr Jylyoı aýdanyndaǵy 60 gıdrogeologıalyq uńǵymany joıý úshin jobalyq-smetalyq qujattama jasaqtaý úshin respýblıkalyq búdjetten 26,5 mln teńge qarjy bólindi. Al, bıyl ıesiz qalǵan uńǵymalardy tyǵyndaý, jabý jumystaryn júrgizýge Qarjy mınıstrligine respýblıkalyq búdjetten 465 mln teńge qarjy bólýge ótinim joldandy», -deıdi Nurlan Jantoqov.
Onyń aıtýynsha, Jylyoı aýdanynyń aýmaǵyndaǵy gıdrogeologıalyq uńǵymalardy joıý ózekti máselege aınalǵan.
«Óıtkeni, bul jaǵdaı jerasty sýlarynyń halyq ıgiligine paıdalanylmaı, bosqa aǵyp ketýine, kóleminiń azaıýyna ákelip soǵýy múmkin. Onyń ústine atalǵan aýdanda sý kózderiniń tapshylyǵy baıqalady. Osyǵan baılanysty jerasty sý kózderin tıimdi paıdalaný máselesin sheshý qajettigi týyndap otyr. Jalpy, Atyraý oblysyn áleýmettik-ekonomıkalyq damytýdyń 2021-2025 jyldarǵa arnalǵan keshendi josparyna ekologıalyq máseleler boıynsha 22 is-shara engizildi», -deıdi Nurlan Jantoqov.