Mundaǵy maqsat — nan baǵasyn turaqtandyrý.
Úkimet otyrysynda QR Prezıdenti Qasym-Jomart Kemeluly Toqaevtyń bıylǵy 11 qańtarda Parlament Májilisinde sóılegen sózinde bergen tapsyrmalaryn oryndaý jónindegi sharalar qaraldy, dep habarlaıdy Almaty-akshamy.kz
Aýyl sharýashylyǵy mınıstri Erbol Qarashókeev Qazaqstannyń agroónerkásiptik kesheninde júıeli sharalar qabyldaý týraly aıtty. Mınıstrdiń aıtýynsha, Memleket basshysynyń tapsyrmasy boıynsha salany memlekettik qoldaý júıesin túzetý boıynsha usynystar daıyndaldy. Olar, eń aldymen, qoldaý tetikterin ońaılatýǵa, baǵyttaryn ońtaılandyrýǵa, sharýashylyq júrgizýdiń mólsheri men nysandaryna qaramastan, barlyq sýbektiler úshin teń qoljetimdilikti qamtamasyz etýge baǵyttalatyn bolady. Sondaı-aq sýbsıdıa alýshylar naqty ındıkatıvtik kórsetkishterge qol jetkizý týraly qarsy mindettemelerdi mindetti túrde qabyldaıtyn norma engiziledi.
«Usynystardy qazirgi ýaqytta qurylǵan Agroónerkásiptik keshendi memlekettik qoldaýdyń tıimdiligin arttyrý jónindegi jumys toby qaraýda. Oǵan salalyq qaýymdastyqtar men odaqtardyń, agrobıznestiń, ǵylymnyń, múddeli memlekettik jáne jergilikti atqarýshy organdardyń ókilderi, sondaı-aq Qazaqstan Respýblıkasy Parlamentiniń Senaty men Májilisiniń depýtattary kirdi. Qazirgi ýaqytta jumys tobynyń úsh otyrysy ótti», — dedi E. Qarashókeev.
Jumys toptarynyń qorytyndylary boıynsha, óńirlerden, salalyq odaqtar men qaýymdastyqtardan, jumys toby múshelerinen agroónerkásiptik keshendi sýbsıdıalaýdyń jańa júıesine kóptegen usynystar men eskertýler kelip túsken. Olar júıelendirilip, negizdi usynystar men eskertýler sýbsıdıalaý júıesin pysyqtaý kezinde eskeriletin bolady. Jumys toptarynyń otyrystaryn ótkizý qorytyndysy boıynsha, 2022 jylǵy naýryzda sýbsıdıalaý júıesin jetildirý boıynsha túpkilikti ózgerister toptamasyn Úkimettiń qaraýyna engizý josparlanýda. Budan basqa, mınıstrlik sýbsıdıalaýdyń biryńǵaı ıntegrasıalanǵan memlekettik aqparattyq júıesin ázirledi. Aqparattyq júıeniń kórsetiletin qyzmetteri sýbsıdıa alýshylar úshin tegin bolady. Qazirgi ýaqytta ol Aqmola oblysynda pılottyq rejımde testileýden ótkiziledi.
Mınıstr atap ótkendeı, azyq-túlikpen qamtamasyz etý máselesin júıeli sheshý maqsatynda Azyq-túlikpen qamtamasyz etý salasyn damytýdyń 2022-2025 jyldarǵa arnalǵan jol kartasy ázirlenip, iske asyrylýda. Jol kartasy sheńberinde azyq-túlikpen qamtamasyz etý jáne aýa raıy faktorlarynyń aýyl sharýashylyǵy óndirisine teris áserin nıvelırleý máselesin sheshý maqsatynda eginshilikti naqty ártaraptandyrý kózdeledi.
«Bıylǵy jyldyń kóktemgi dala jumystaryn ýaqytyly ári sapaly júrgizý maqsatynda mınıstrlik barlyq qajetti sharalardy qabyldaýda. Mınıstrlikte óńirlerdegi kóktemgi egisti júrgizý jumystaryn úılestirý boıynsha jedel shtab quryldy. Agroónerkásiptik keshen sýbektilerin qoldaý jónindegi is-sharalardy júrgizý úshin aýyl sharýashylyǵy taýaryn óndirýshilerge «Keń dala» baǵdarlamasy arqyly 70 mlrd teńge kóleminde jáne Azyq-túlik kelisimshart korporasıasynyń forvardtyq satyp alýy arqyly 80 mlrd teńge kóleminde jeńildikti kredıt beriletin bolady», — dedi E.Qarashókeev.
Ótken jylǵy qurǵaqshylyq, sondaı-aq qosalqy bólshekter, janar-jaǵarmaı, mıneraldy tyńaıtqyshtar men pestısıdter baǵalarynyń kúrt ósýi aldaǵy kóktemgi egisti ýaqytyly daıyndaý jáne sapaly júrgizý úshin eleýli qıyndyqtar týǵyzýda.
«Osyǵan baılanysty, fermerlerge qoldaý kórsetý maqsatynda respýblıkalyq búdjetti naqtylaý kezinde kóktemgi dala jumystaryna búdjettik kredıtti ulǵaıtý múmkindigin qarastyrýdy suraımyz. Aýyl sharýashylyǵy taýarlaryn óndirýshilerdi kóktemgi dala jumystaryn júrgizýge naryqtyq baǵadan 15%-ǵa tómen baǵamen keminde 380 myń tonna arzandatylǵan dızel otynymen qamtamasyz etý máseleleri sheshilýde. Otandyq mıneraldy tyńaıtqysh óndirýshilermen aýyl sharýashylyǵy eńbekkerleriniń qajettilikterin tolyq qamtamasyz etý týraly ýaǵdalastyqqa qol jetkizildi. Tuqym, tyńaıtqysh pen pestısıd satyp alýdy sýbsıdıalaýǵa 2022 jyly 70 mlrd teńge kózdeldi», — dedi Aýyl sharýashylyǵy mınıstri.
Oblystardyń derekteri boıynsha, 2022 jyly aýyl sharýashylyǵy daqyldaryn 22,9 mln gektar alqapqa egý josparlanýda, bul 2021 jylǵy deńgeıden 13,5 myń gektarǵa kóp.
«Oblystar ákimdikteri agrotehnologıalardy saqtaý, ylǵal resýrstaryn únemdeý tehnologıalaryn qoldaný ólshemsharttaryn mindetti túrde saqtaı otyryp, olardy keńinen qoldaný arqyly qolda bar ylǵal qorlaryn saqtaý, uqypty paıdalaný sharalaryn qabyldaýy qajet. Jalpy, kóktemgi dala jumystaryna daıyndyq josparly rejımde júrip jatyr», — dedi vedomstvo basshysy.
Memleket basshysynyń tapsyrmasy boıynsha áleýmettik mańyzy bar azyq-túlik taýarlarynyń baǵasyn turaqtandyrý maqsatynda Agroónerkásiptik keshendi damytýdyń 2025 jylǵa deıingi ulttyq jobasy sheńberinde ımportty almastyrý jónindegi sharalar kesheni kózdeldi.
Mınıstrlik mynadaı jedel sharalar qabyldady: 2022 jylǵy 1 shildege deıingi merzimge 125 myń tonna kúnbaǵys tuqymdary men 110 myń tonna kúnbaǵys maıy eksportyna sandyq shekteýler engizý; kartop pen sábizdi eksporttaýǵa 3 aı merzimge tyıym salý; iri qara mal men usaq maldy eksporttaýǵa 6 aı merzimge tyıym salý.
Sondaı-aq nan baǵasyn turaqtandyrý maqsatynda qańtardan bastap Azyq-túlik kelisimshart korporasıasy áleýmettik nan óndirý úshin óńirlerge ótkizetin astyq quny sýbsıdıalanatyn bolady. Bul tetik Azyq-túlik kelisimshart korporasıasynyń ishki naryqqa astyqty naryqtaǵydan tómen baǵamen ótkizý shyǵystaryn óteýdi kózdeıdi.