Astanada búginnen bastap birqatar uıymdar jańa jumys kestesimen jumys isteı bastady. Qala ákimdiginiń málimetinshe, bul qadam joldaǵy kólik keptelisin azaıtý úshin qolǵa alynǵan,- dep habarlaıdy Aqshamnews.kz tilshisi.
Jańa tártip qala ortalyǵyndaǵy memlekettik jáne jartylaı memlekettik mekemelerge qatysty. Endi qalalyq komýnaldyq qyzmetter men ákimdik qyzmetkerleri jumys kúnin tańǵy 7:30-da bastaıdy. Keıbir memlekettik organdar men jartylaı memlekettik kompanıalar da jumysqa 7:30-8:00 aralyǵynda kirisedi. Tıisinshe, jumys ýaqytynyń aıaqtalýy da erterek bolady.
Ákimdik atap ótkendeı, bul ózgeris jeke sektorǵa, bıznes nysandaryna, mektepter men balabaqshalarǵa, aýrýhanalar men emhanalarǵa, HQKO-lar men ózge de áleýmettik mekemelerge qatysty emes. Keıbir mınıstrlikter men memlekettik organdar burynǵydaı tańǵy 8:00-de jumysyn bastaıdy.
Aıta ketsek, Astanada jumys kestesin erterekke aýystyrý týraly másele bıyl naýryzda kóterilgen. Maýsymda qala ákimi Jeńis Qasymbek bul usynys memlekettik organdar men komýnaldyq qyzmetter úshin qarastyrylyp jatqanyn aıtqan. Al májilis depýtaty Asylbek Nuralın ortalyq bılik organdary men ulttyq kompanıalardyń jumys ýaqytyn 07:00 nemese 08:00-ge aýystyrýdy usynǵan edi.
31 tamyzda ákimdik jumys kestesiniń resmı túrde ózgergenin jarıalady. Jergilikti bılik bul sheshim kólik aǵynyn rettep, magıstraldardaǵy júktemeni azaıtýǵa kómektesedi dep kútip otyr.