Almatyda jolaýshylardyń qaýipsizdigin qamtamasyz etý jáne tasymaldaý kezinde zań talaptarynyń saqtalýyn baqylaýǵa baǵyttalǵan "Quqyqtyq tártip" jedel aldyn alý is-sharasy jalǵasyp jatyr, dep habarlaıdy Aqshamnews.kz tilshisi Polisia.kz-ke silteme jasap.
Polısıanyń málimetinshe, erekshe nazar qalaaralyq jáne halyqaralyq baǵyttarǵa aýdarylyp otyr. Sebebi bul baǵyttarda jolaýshylar tasymaly erejelerin buzý, kólikti ruqsatsyz qaıta jabdyqtaý, tehnıkalyq baıqaýdan ótpegen kólikti paıdalaný jáne qaýipsizdik talaptaryn saqtamaý sıaqty zań buzýshylyqtar jıi anyqtalady.
Reıd barysynda tártip saqshylary tasymaldaýshy kompanıalardyń qyzmetin jáne "Saıran" avtovokzaly mańyndaǵy jeke shaǵyn avtobýstardy tekserip jatyr. Ereje buzý derekteri tirkelgen jaǵdaıda, árqaısysy boıynsha zańǵa sáıkes sharalar qabyldanady.
"Jolaýshylardyń qaýipsizdigi - Almaty polısıasy úshin basty mindet. Ásirese qalaaralyq jáne halyqaralyq baǵyttarda tasymaldaýshylarǵa baqylaý kúsheıtildi. Ereje buzýshylyqtar tek qolaısyzdyq týǵyzyp qana qoımaı, adamdardyń ómiri men densaýlyǵyna qaýip tóndiredi. Biz mundaı faktilerdi der kezinde anyqtap, jolyn kesýge tyrysamyz. Osy arqyly qala turǵyndary men qonaqtarynyń ózin qaýipsiz sezinýin qamtamasyz etkimiz keledi", - dedi Áýezov aýdandyq polısıa basqarmasynyń bastyǵy Danıar Meńdebaev.