Abaı oblysynyń Maqanshy aýdanynda Alakól jaǵalaýyn shaıyp ketý qaýpine baılanysty tótenshe jaǵdaı rejımi engizildi, dep habarlaıdy Aqshamnews.kz tilshisi.
Aýdan ákimi Dáýren Qoıgeldın qol qoıǵan 8 qyrkúıektegi aýdandyq tótenshe jaǵdaılar komısıasy otyrysynyń hattamasyna sáıkes, 10 qyrkúıekten bastap jergilikti deńgeıdegi tótenshe jaǵdaı kúshine engen. Bul sheshim Qabanbaı aýyldyq okrýgindegi Alakól jaǵalaýyn sý shaıyp ketý qaýpine baılanysty qabyldanǵan.
Qujatta kórsetilgendeı, óńirdiń injý-marjany sanalatyn Alakól jaǵalaýynda demalys úıleri men ózge de nysandar ornalasqan. Tabıǵı apat saldarynan sharýashylyq qyzmetke kelýi múmkin zalal arnaıy quqyqtyq rejım engizýge negiz bolǵan.
Tótenshe jaǵdaıdy joıý jumystaryn úılestirý aýdan ákiminiń orynbasary Álıa Sarbaevaǵa júkteldi. Aıta keteıik, jýyrda oblys ákimi Berik Ýálıdiń tóraǵalyǵymen ótken jıynda týrızmdi damytý máseleleri qaralyp, Alakól jaǵalaýynyń bas josparyn ázirleý talqylanǵan edi.
Basqarma málimetinshe, bıyl jaǵalaýdy abattandyrýǵa oblystyq búdjetten 658 mıllıon teńge bólingen. Sheneýnikterdiń aıtýynsha, arbatta jóndeý jumystary júrgizilip, 25 kıim aýystyratyn kabına, 50 konteıner, 2 bıodárethana, 3 zamanaýı dárethana ornatylǵan. Sondaı-aq 7 pırstiń 3-eýi paıdalanýǵa berilip, jańa qoǵamdyq aýmaq qurylysy aıaqtalǵan.