Almaty qalasyndaǵy jastardyń baspana máselesin sheshýge baǵyttalǵan «Almaty jastary» baǵdarlamasy kóptegen jas mamandarǵa óz úıiniń ıesi atanýǵa múmkindik berýde. Memlekettik qoldaýdyń arqasynda jas otbasylar jaldamaly páterden óz úıine kóship, baspanaly bolǵandaryn toılaýda. Baspana alý sharttary qoljetimdi bolyp, jastar úshin jańa múmkindikter ashylyp, Almaty qalasynyń jastary úshin turǵyn úı alý burynǵydan da qoljetimdi bola tústi!
Osy jyly baspanaly bolǵandardyń biri – Almaty qalasynyń týmasy, jas páter ıesi Ásem ERJANQYZY óz tájirıbesin bylaı baıandaıdy:
- «2019 jyly elimizdiń Prezıdenti «Jastar jyly» dep jarıalaǵan kezde, jastarǵa baǵyttalǵan jańa múmkindikter esigi ashyldy. Sol jyly iske qosylǵan «Almaty jastary» baǵdarlamasy, 29 jasqa deıingi jastardyń bolashaǵyna senimdi qadam jasaýǵa múmkindik berdi. Men de sol talaptarǵa saı bolyp, baǵdarlamanyń alǵashqy shaqyrýyna qatysyp, birinshi negizgi tizimge endim. 2020 jyldyń naýryz aıynda ótinishimdi tapsyrǵan soń, prosestiń ár qadamy aıqyn jáne túsinikti túrde uıymdastyryldy. Qujattardy daıyndaý men tapsyrý kezindegi barlyq nusqaýlyqtar maǵan jeńil ári túsinikti bolyp berildi. Nátıjesinde, maýsym aıynda men 46 sharshy metrlik, zamanaýı jabdyqtalǵan jáne óte yńǵaıly páterimdi aldym. Bul páter men úshin jaı ǵana tórt qabyrǵadan quralǵan úı emes, bolashaqqa degen senimniń nyshanyna aınaldy. Eger osy baǵdarlama arqyly baspanaly bolmasam, basqa da memlekettik baǵdarlamalardyń talaptary tym kóp jáne kúrdeli bolǵandyqtan, óz úıimdi alý múmkindigi áldeqaıda qıyn bolar edi. Sondyqtan da «Almaty jastary» baǵdarlamasy jastarǵa tıimdi sharttar usyný arqyly óz armandaryna qol jetkizýge jol ashty. Men ózimniń arman úıime qol jetkizgenime óte qýanyshtymyn. Bul múmkindik men sıaqty kóptegen jas mamandardyń ómirinde jańa betburys bolyp tabylady. Osyndaı qoldaýdy kórgen árbir jas azamat óz bolashaǵyn jarqyn ete alatynyna senimdimin. Páter alǵandardyń barlyǵyn shyn júrekten quttyqtaı otyryp, jastarǵa osyndaı múmkindik jasap, qoldaý kórsetken prezıdentimizge jáne baǵdarlamany iske asyrýǵa atsalysqan barlyq qyzmetkerlerge sheksiz alǵysymdy bildiremin.»
Bul baǵdarlama jastardyń bolashaǵyna degen senimin arttyryp, arman úılerine jol ashyp, memlekettik qoldaýdyń naqtyly úlgisine aınaldy. Sonymen qatar, osyndaı qoldaýlar jastardyń áleýmettik jáne ekonomıkalyq damýyna úles qosyp, elimizdiń turaqty ósýine yqpal etedi. Osylaısha, jastarǵa arnalǵan osyndaı baǵdarlamalar tek baspana alý máselesin sheship qoımaı, olardyń bolashaqqa degen úmitin arttyryp, jańa múmkindikter esigin ashady.