Almaty qalasyndaǵy jastardy turǵyn úımen qamtamasyz etýge baǵyttalǵan «Almaty jastary» baǵdarlamasy kóptegen jas mamandarǵa óz baspanasyna qol jetkizýge múmkindik berdi. Solardyń biri – Ádiljan Jabyqbaı.
Almaty qalasynyń týmasy, Qazaq avtomobıl-jol akademıasynyń «Injener-mehanık» mamandyǵyn támamdaǵan jas maman 2018 jyldan beri Almaty elektromehanıka kolejinde óndiristik oqytý sheberi bolyp qyzmet atqaryp keledi. Ol baspanaly bolý úshin memlekettik baǵdarlamanyń múmkindigin paıdalanýdy jón kórgen.
– «Almaty jastary» baǵdarlamasy týraly burynnan biletinmin, sondyqtan múmkindik paıda bolǵan kezde qatysýǵa sheshim qabyldadym. Alǵashqy jyly qujattarymdy tapsyrǵanymda, rezervke ǵana ilinip, joldama ala almadym. Biraq úmitimdi úzbeı, kelesi jyly qaıta ótinish berdim. Qujat tapsyrý qıyn bolǵan joq, bári elektrondyq formatta júzege asyryldy. Ekinshi ret qatysqanymda, konkýrs nátıjesi boıynsha jeńimpaz atanyp, bir bólmeli páterge ıe boldym. Qazir óz shańyraǵym bar, turaqty ómir súrýge múmkindik aldym, – deıdi jas maman.
Ádiljannyń aıtýynsha, bul baǵdarlama jastar úshin úlken qoldaý. Alaıda qazirgi naryqtaǵy baspana baǵasy jyl sanap ósip kele jatqandyqtan, baǵdarlama aıasynda beriletin shekti somany kóbeıtý qajettiligi týyndap otyr.
– Úı baǵasy aıtarlyqtaı qymbattap ketti, sondyqtan «Almaty jastary» baǵdarlamasyna bólinetin qarjy kólemin ulǵaıtsa degen usynys bar. Kóp jastar qazirgi tańda otbasyly, balalary bar. Sondyqtan tek bir bólmeli emes, eki nemese úsh bólmeli páter alýǵa múmkindik jasalsa, bul jastar úshin úlken kómek bolar edi, – deıdi ol.
Jalpy, bıyl 6000-nan astam almatylyq memlekettik turǵyn úı baǵdarlamalary aıasynda baspanaly bolady dep josparlanǵan. Onyń ishinde «Almaty jastary» baǵdarlamasy boıynsha jeńildetilgen ıpotekalyq nesıe alý múmkindigi qarastyrylǵan. Bul baǵdarlama jas mamandarǵa tómen paıyzben páter alý múmkindigin usynyp qana qoımaı, olardyń bolashaqqa degen senimin nyǵaıtady.
Jastarǵa qandaı jeńildikter qarastyrylǵan?
Qazirgi tańda qalada 40 myńnan astam adam baspana kezeginde tur. Olardyń qatarynda halyqtyń áleýmettik osal toptaryna jatatyn azamattar da bar. Baspana máselesin sheshý úshin memleket tarapynan birneshe jeńildetilgen ıpotekalyq baǵdarlamalar usynylǵan. Olardyń qatarynda:
· «Almaty jastary» – 5%-dyq jeńildetilgen nesıe, 35 jasqa deıingi azamattarǵa arnalǵan.
· «Baqytty otbasy» – 2%-dyq nesıe, kópbalaly otbasylar, 1 jáne 2-toptaǵy múgedekter, jetim balalar úshin.
· «Shańyraq» – 5%-dyq jeńildetilgen ıpoteka, baspana kezeginde turǵan azamattarǵa arnalǵan.
Sondaı-aq, memlekettik baǵdarlamalar aıasynda alǵashqy jarnanyń bir bóligin óteýge kómektesetin turǵyn úı sertıfıkattary qarastyrylǵan. Bul jas mamandarǵa turǵyn úı alýda úlken jeńildik beredi.
Jastarǵa qoldaý kórsetetin osyndaı bastamalardyń arqasynda kóptegen jas mamandar óz baspanasyna qol jetkizip, bolashaqqa nyq qadam basýda.