«Almaty aqshamy» gazetiniń 35 jyldyq merekesine oraı, basylymda ár jyldary eńbek etken ardagerler redaksıamyzda bas qosty.
Bizdiń qazaq «Kóp jasaǵannan emes, kópti kórgennen sura» degen ǵoı. Sol aıtpaqshy, qaı kezde de aǵa býynǵa arqa súıeıtinimiz ras. Ómirdiń ashshy-tushshysyn tatyp, baspasózde kóp jyl eseli eńbek etken, «Aqshamda» mańdaı teri sińip, qoltańbasy qalǵan ardagerlerge degen qurmetimiz erekshe. Ótkensiz kemel keleshek bolmaıtyny syndy, aqyldy qarıasyz-aǵyndy darıasyz, ıgiligi mol ıdeıasyz jasampaz gazet shyǵarý múmkin emes.
«Ózderińizdiń baı tájirıbelerińiz keıingi orta býyn men jas býynǵa asa qajet. Osy maqsatty alǵa tutyp, mereıli data aldynda dastarhannan dám tatqyzyp, ózderińizdiń aqyl-keńesterińizge qulaq túrgimiz keldi», – dedi «Aqsham» redaksıasynda ardagerlerdi aqjaryla qarsy alǵan «Alatau Aqparat» JSHS-nyń Bas dırektory Erjan Qalymbaıuly.
«Aqshamǵa» aq batasyn arnaǵan Qazaqstannyń qurmetti jýrnalısi Sársenbek Bekmuratuly bastaǵan Qanat Qaıym, Ótesh Qyrǵyzbaı, Ermek Jumahmetuly, Zeınolla Abajanov, Jeksen Alpartegi, Nurjamal Baısaqal, Qarlyǵash Besirova ózderiniń súıikti gazetine ystyq yqylasyn bildirip, tilegin arnap, usynysyn jetkizdi. Qarlyǵash zamandasymyzdyń jary, basylym eńbektorysy, Jeltoqsan qaharmany Quttybek Aımahan (marqum) ekeýiniń tanysyp, bilisýine «Aqsham», otaý qurýyna aqshamdyqtar sep bolǵanyn aıtty.
Gazet te jandy dúnıe. Onyń da ósý, kemeldený kezeńi bolady. Búgingi aqparat quraldaryna jańasha sheshim, jańasha qadam jasalýy qajettigi taǵy bar. Álemde júrip jatqan aqparattyq-psıhologıalyq maıdan sony kórsetýde.
«Aqparattyq strategıamyzdy nyǵaıtpaq oıdamyz. Basylymnyń syrtqy kelbetin ózgertip qana qoımaı, ishki mazmunyna mán bermekpiz. Búgingi zaman sapaly aqparat dáýiri ǵoı», – degen JSHS Bas dırektory qurmetti qonaqtarǵa gazettiń aldaǵy baǵyt-baǵdary jaıynda málim etti.
Emen-jarqyn júzdesýden soń ardagerler redaksıa ǵımaratynyń aldynda estelik sýretke tústi. Óz kezeginde biz de aldy seksenniń seńgirine shyqqan qalamgerlermen «tek jaqsylyqta jolyǵaıyq, jaqsy kúnderde kezdeskenshe» dep qosh aıtystyq.