Mereke aıasynda myń jasaǵan shahardyń shamshyraǵy «Almaty aqshamy» gazetiniń 35 jyldyq mereıtoıy atalyp ótti.
Buqaralyq aqparat quraldary kúnine oraı «Alatau Aqparat» medıaholdıngine birikken «Almaty aqshamy» men «Vechernıı Almaty» gazetteri men Almaty-akshamy.kz jáne Vecher.kz saıttarynyń ujymy tabıǵat aıasyna shyǵyp, demalyp qaıtty.
Ashyq aspan astynda uıymdastyrylǵan merekelik keshke «Qazaq gazetteri» JSHS Almaty fılıalynyń jetekshisi Dýman Anash, «Túrkitildes jýrnalıser qorynyń» prezıdenti Názıa Joıamergenqyzy men «Adyrna» qoǵamdyq uıymynyń basshysy Arman Áýbákir qonaq retinde qatysyp, medıaholdıng ujymyn kásibı merekelerimen quttyqtady. Kesh barysynda ataýly dataǵa oraı «Alatau Aqparat» medıaholdınginiń Bas dırektory Erjan Qalymbaıuly «Almaty aqshamy» gazetiniń Bas redaktory Tórehan Danıarov pen «Vechernıı Almaty» gazetiniń basshysy Evgenıı Raqymjanovqa QR Parlamenti Senatynyń tóraǵasy Máýlen Áshimbaevtyń Alǵys hatyn tabystady.
«Ótken aıda «Alatau Aqparat» medıaholdıngin damytýǵa qatysty bir jyldyq strategıamyzdy bekittik. Aldaǵy ýaqytta basylymdy zaman talabyna saı, búgingi oqyrman suranysyna laıyq etip, sapaly kontentter daıarlaý, jazylymdy arttyrý syndy josparlarymyz bar. Ol úshin bizge judyryqsha jumylyp jumys isteý kerek. Barlyqtaryńyzdyń otbasylaryńyzǵa amandyq, shyǵarmashylyqtaryńyzǵa shadyman shabyt tileımin», – degen medıaholdıng basshysy Erjan Qalymbaıuly qos basylymnyń birqatar qyzmetkerlerin marapattap, kópbalaly otbasylarǵa balalarǵa arnalǵan jazǵy demalys lagerlerine joldamalar usyndy.
Medıaholdıngtiń kúndelikti qyzmeti men damýyna eleýli úles qosqany úshin «Almaty aqshamy» gazetiniń tilshisi Oljas Joldybaı, korektor Kenje Núsipova, bet qattaýshy Aıshat Abýova, kólik júrgizýshi Nursultan Qurmanov syndy qyzmetkerlerimiz Alǵys hattarmen marapattaldy. Al Aıdyn Sultanbekovke otbasymen demalyp qaıtýǵa joldama berildi.
Tańmen talasa bas qosqan qos ujymnyń jýrnalıseri bul kúnniń Ulttyq dombyra kúni ekenin de esten shyǵarǵan joq. Taýǵa shyqsa da qanjyǵasyna dombyrasyn baılap ala júretin «aqshamdyqtar» úshin de bul kıeli aspaptyń orny bólek.
Iá, «áý demeıtin qazaq joq», «jigitke jeti óner de az» dep biletin ónerli jandar «Aqshamda» da jeterlik. Merekege oraı jaıylǵan dastarhan basynda áriptesimiz Estaı Bojan aqyn Juban Moldaǵalıevtiń sózine jazylǵan, kompozıtor Ilá Jaqanovtyń áni «Edil men Jaıyqty», Kenen Ázirbaevtyń «Tik shyrqaý» ánderin áýelete shyrqaǵanda, uıyp tyńdadyq. Kúmbirlete kúı shertken áriptesterimizdiń óneri de tánti etti. Merekelik kesh barysynda gıtaramen de án aıtyldy, bı de bılendi. Keshimizdiń kóńildi ótýi úshin qyzyqty oıyndar uıymdastyryldy. Aınalasy jasyl jelekpen kómkerilgen, syldyrap aqqan móldir sýy bar ózen jaǵasynda estelik sýretterge tústi.
«Alatau Aqparat» medıaholdıngi tabıǵat tósindegi ujymdyq demalysty ózgeshe formatta atap ótti.