Elimizdiń túkpir-túkpirinde kúnine qansha tótenshe oqıǵa bolyp jatatynyn biz bile bermeımiz. Sonyń biri – órt.
Kúni keshe ǵana Almatydaǵy «Aqkent» yqshamaýdanynda kópqabatty úı otqa orandy. «Apat aıtyp kelmeıdi» desek te, mundaı keleńsiz jaǵdaıǵa jol bermeýdi oılastyrý, aldyn alýdyń múmkindikterin qarastyrý asa mańyzdy.
Basqa megapolısterdegi sıaqty, sońǵy ýaqytta Almatyda da tóbesi kók tiregen záýlim úıler kóptep boı kóterýde. Burynǵy salynǵan úılerde, negizinen, tabıǵı, sapaly materıaldar paıdalanylǵan bolsa, qazirgi qoldanystaǵylardyń deni – sıntetıka men plasık. Bir anyǵy, olar janǵan kezde bólinetin nárse tabıǵı zattardykine qaraǵanda anaǵurlym ýly ekeni jáne órttiń taralýy da aıtarlyqtaı tez bolatyny málim. Mundaı jaǵdaıda qyzyl jalyn qursaýynda qalǵan adamdardy qutqarý úshin árbir mınýt, tipti árbir sekýnd qymbat.
Tehnologıa jetilgen búgingi zamanda kópqabatty úılerdiń qurylysyn órt qaýipsizdigin qamtamasyz ete otyryp júrgizý qarastyrylmaıdy dep aıta almaımyz. Biraq mamandar tıisti normalar jobada kórsetilgenimen, qurylys barysynda saqtala bermeıtinin joqqa shyǵarmaıdy. Bul rette, turǵyndardyń ózderi de páterlerin bastapqyda qarastyrylmaǵandaı ǵyp qaıta jobalap, keıde tipti órtke qarsy júıelerdi óshirip, órt sóndirýshilerge arnalǵan ótkelderdi jaýyp tastaıtyn kórinedi.
Munyń syrtynda, qurylys júrgizýshi kompanıalardyń da barlyǵy birdeı qajetti normalardy eskere bermeıdi. Mysaly, Almatydaǵy keıbir turǵyn úı keshenderinde arasynan arnaıy tehnıka túgili, adam áreń ótetin, ıaǵnı bir-birine tym jaqyn salynǵan úıler kóp. Al aıaqasty tótenshe jaǵdaı bola qalsa, bul ásirese joǵary qabattardaǵy turǵyndar úshin óte qaýipti. Óıtkeni kópqabatty ǵımarattardaǵy tik qubyr tútin men órttiń joǵaryǵa tez kóterilýine jol ashady. Iaǵnı tómengi qabatta ot shyqsa, birneshe mınýttan keıin-aq eń joǵary qabattaǵylar tunshyǵa bastaıdy. Tútinnen kóz asha almaıtyn ǵımaratta baspaldaqqa júgirý de tıimsiz. Sondaı-aq, órt kezinde lıftini paıdalanýǵa da tyıym salynady. Lıft shahtasymen taralǵan tútin elektr jelisin isten shyǵaryp, adam múlde qursaýda qalyp qoıýy múmkin.
Iaǵnı órt qaýipsizdigin qamtamasyz etý úshin kópqabatty úılerde tútin shyǵarý, órt sóndirý júıeleri, temperatýra dachıkteri minsiz jumys isteýi qajet, evakýasıalyq baspaldaqtar ashyq jáne bos bolýǵa tıis.
Órttiń eń aýyr saldary – adam ómirine tónetin qaýip. Bul jerde tek otqa oranǵan páter turǵyndary ǵana emes, qanshama órt sóndirýshiler basyn qaterge tigedi! Olar tek qyzmet babymen ǵana áreket etpeıdi, ózderiniń adamdyq, azamattyq boryshyn da óteıdi. Alapat órtpen alysa júrip turǵyndardy qutqarǵanymen, ózderin kúıik shalyp, aýyr jaraqat alǵandary, tipti ómirmen qoshtasqandary qanshama!..
Kúni keshe «Aqkentte» bolǵan órtte de Almatynyń Tótenshe jaǵdaılar departamenti qyzmetkerleriniń janqıarlyq áreketi arqasynda talaı turǵyn aman qaldy. Al solardyń eńbegi laıyqty baǵalanyp júr me? Ózderiniń qaýipsizdigine qanshalyqty kepildik bar? Ol, árıne, bólek áńgime.