Osy aptada qalamyzda bolǵan mańyzdy jańalyqtarǵa sholý.
Zamanaýı sheshim
«Alatau Aqparat» medıaholdınginde zamanaýı podkast stýdıasynyń ashylý saltanaty ótti. İs-sharaǵa belgili medıamenedjerler, telearnalar men BAQ basshylary, blogerler, ıýtúberler men kásipkerler, seriktes ujym ókilderi qatysty. Jobanyń basty maqsaty – dástúrli jáne jańa medıany ushtastyra otyryp, keń aýdıtorıaǵa ártúrli formatta sapaly kontent usynyp, otandyq medıa salany damytýǵa úles qosý. Zamanaýı tehnıkalarmen jabdyqtalǵan bul alań – shyǵarmashylyq jobalarǵa serpin berip, jas mamandardy daıarlaýǵa, aqparat keńistiginde jańa ıdeıalardy júzege asyrýǵa múmkindik beredi.
Ashylý saltanatynda «Alatau Aqparat» medıaholdınginiń Bas dırektory Erjan Qalymbaıuly «Stýdıany qoǵamdaǵy ózekti máselelerdi talqylaıtyn, saraptamalyq pikirler men eksklúzıvti suhbattar usynatyn mazmundy alańǵa aınaldyrýdy maqsat etip otyrmyz. Podkasttar aýdıtorıanyń aqparat tutyný daǵdysyna saı ázirlenip, ashyq, erkin ári tartymdy formatta usynylady. Basty maqsat – aqparatty sapaly, senimdi, naqty ári qyzyqty etý», - dedi.
Alǵashqy reıs Almatydan bastalady
Air Arabia Abu Dhabi áýekompanıasynyń reısteri 1 maýsymnan bastap Qazaqstanǵa qatynaıdy. Jańa kompanıa "Abý-Dabı – Almaty" baǵyty boıynsha aptasyna úsh ret – seısenbi, juma jáne jeksenbi kúnderi tikeleı reısterin oryndaýǵa múddeli.
Jedel járdemge jol ber!
22 sáýir kúni saǵat 15:30-da Trýdovaıa jáne Áshimov kósheleriniń qıylysynda jol erejesin buzý deregi anyqtaldy. Toyota kóliginiń júrgizýshisi jypylyqtaıtyn shamdary qosylyp turǵan jedel járdem kóligine jol bermegen. Júrgizýshi áıel jaýapkershilikke tartyldy.
Zańǵa baǵynbasań, zaryn tartasyń!
Almaty qalalyq PD jergilikti polısıa qyzmeti basqarmasy bastyǵynyń orynbasary Tımýr Noǵaıbaevtyń aıtýynsha, 5 sáýirden beri 1,5 myńnan astam moped júrgizýshisi túrli quqyq buzýshylyqtar úshin jaýapqa tartylyp, 500-den astam kólik aıyppul turaǵyna qoıylǵan. Polısıa mopedti tirkeýsiz, júrgizýshi kýáliginsiz jáne qorǵanys quraldarynsyz júrgizý zańmen jazalanatynyn eskertedi. Basty maqsat – jol qozǵalysy qaýipsizdigin qamtamasyz etip, azamattardyń quqyqtyq sanasyn arttyrý.
Eki kóziń – shyraǵyń
Almaty Ortalyq qalalyq klınıkalyq aýrýhanasynda alǵash ret donorlyq nurly qabyqty almastyrý otasy jasaldy. IV dárejeli keratokonýs dıagnozy qoıylǵan naýqas joǵary tehnologıalyq aralasýdyń arqasynda kózdiń kórýin qalpyna keltirýge múmkindik aldy. Ota sátti ótti jáne naýqas qalpyna kelip jatyr.
Bazarǵa baryp, baǵyńdy syna!
Demalys jármeńkelerine qatysýshylar kóbeıdi. Almatydaǵy demalys kúnderi ótetin jármeńkelerge 300-den astam aýyl sharýashylyǵy óndirýshileri qatysyp jatyr. Almatyda demalys kúni jármeńkelerine qatysýshylar sany 317-ge jetti. Jármeńkelerge apta saıyn 45000-nan astam adam qatysady. Satylymda jańa soıylǵan mal eti, jumyrtqa, kókónister, jemister, ashytylǵan sút ónimderi, shujyqtar, bal jáne basqa da taýarlar bar. Jalpy taýar túri 1000 ataýdan asady.
Balalar qaýipsizdigi basty orynda
Almatyda "Qaýipsiz jol" aksıasy aıasynda 20 kóshege jol tańbalary syzylyp, balalardyń qaýipsizdigi kúsheıtildi. İs-sharanyń negizgi maqsaty – barlyq jol qozǵalysyna qatysýshylar, ásirese balalar úshin qaýipsiz jaǵdaı qalyptastyrý. Almaty qalalyq Polısıa departamentiniń ákimshilik polısıa basqarmasy bastyǵy Asqat Qulbaevtyń aıtýynsha, jyl basynan beri qalada 1 000-nan astam jańa jol belgileri ornatylyp, tozyǵy jetken 352 belgi jańasyna aýystyrylǵan.
«Almatynyń jas jazýshysy – 2025» baıqaýynyń jeńimpazdary marapattaldy
Qazaq tilindegi shyǵarmalar arasynan úzdik dep tanylǵan shyǵarma – Abaı atyndaǵy daryndy balalarǵa arnalǵan mektep-ınternatynyń oqýshysy Shyraılym Aıbekqyzynyń týyndysy. Ol óz áńgimesin Saparǵalı Begalınniń «Aldanǵan jolbarys» atty shyǵarmasynyń negizinde jazǵan. Al orys tilindegi jumystardyń ishinde eń joǵary baǵany №52 jalpy bilim beretin mekteptiń oqýshysy Renat Bekkýlovtyń «Volshebnoe pýteshestvıe v mır Sapargalı Begalına» atty shyǵarmasy ıelendi.
Almaty qalasynyń ákimi Alataý aýdanynyń halqymen kezdesti
Bıyl Alataý aýdanynyń búdjeti 30%-ǵa ósken. Aýdanda taǵy bir dárigerlik ambýlatorıa ashylady. Jańa oqý jylynda Terekti, Samǵaý, Qarasý jáne Aqbulaq shaǵyn aýdandarynda bes mektep ashý josparlanǵan. Sonymen qatar bıyl 18 shaǵyn aýdanda 81 km jol jóndeý josparlanǵan.
Sýdyń da suraýy bar
Jyl sońyna deıin turǵyndardyń 90%-y sý eseptegishke kóshedi. Almatyda sý esepteý júıesin jańǵyrtý jumystary qarqyn alǵan. Qala ákimi Erbolat Dosaevtyń aıtýynsha, búginde qalada qoljetimdi ári sapaly eseptegishterdi usynatyn 20 kompanıa jumys isteıdi. Qazir eseptegish ornatý baǵasy jaǵynan da, qoljetimdilik turǵysynan da qıyndyq týǵyzbaıdy.
Ulttyq kitap kúni qalamyzda qalaı atap ótildi?
23 sáýir – Qazaqstanda Ulttyq kitap kúni. Bul kún kitap oqý men ádebı mádenıetti damytýdyń mańyzdylyǵy aıqyndaıtyn mereke bolyp tabylady. Almatyda osy kúnge oraı kitaphana isin qoldaýǵa, jastardyń shyǵarmashylyq áleýetin damytýǵa jáne kitapty bilim men ózin-ózi damytýdyń basty quraly retinde nasıhattaýǵa baǵyttalǵan birneshe iri is-shara ótti.