Jańa urpaq ıntervensıalyq kardıologıasy: Almaty QKO TAVI tájirıbesin bólisti
Almaty Qalalyq kardıologıalyq ortalyǵynda aortalyq qaqpaqshany transkateterlik jolmen aýystyrý (TAVI) boıynsha master-klass ótti, dep habarlaıdy aqshamnews.kz
Shvesıadan kelgen belgili maman, Karolınska ýnıversıtetiniń profesory Naýzad Saleh óz tájirıbesin bólisti.
Oqytý barysynda úsh TAVI otasy sátti oryndaldy. Bul tájirıbe dárigerlerge ozyq tehnologıany qoldaný arqyly zamanaýı ádistiń qyr-syryn meńgerýge jáne halyqaralyq standarttarǵa saı mashyǵyn shyńdaýǵa múmkindik berdi.
TAVI (Transcatheter Aortic Valve Implantation) - qolqa qaqpaqshasyn dástúrli ashyq ádispen almastyrýǵa balama retinde usynylatyn shaǵyn ınvazıvti prosedýra.
Bul ádis aýyr aortalyq stenozy bar, dástúrli ota jasaýǵa qarsy kórsetilimi bar naýqastarǵa, ásirese jasy úlken nemese qatar júretin aýrýlary bar adamdarǵa usynylady.
TAVI-diń basty artyqshylyǵynyń biri - ońaltý kezeńiniń qysqa bolýy jáne otadan keıingi asqyný qaýpiniń tómendigi.
Qalalyq kardıologıalyq ortalyq dırektorynyń orynbasary Amına Rakıshevanyń aıtýynsha, bul ota eń aldymen júrek-qan tamyrlary aýrýymen uzaq aýyratyn naýqastar úshin mańyzdy. «Bul - jyldar boıy syrqatpen kúresip, birneshe ret em qabyldaǵan, aýrýhanaǵa túsken, biraq únemi kútken nátıjege qol jetkize almaǵan pasıentter. TAVI ádisi ásirese 70 jastan asqan jandarǵa tıimdi, sebebi olarǵa qaýipsiz ári jumsaq em alý múmkindigin beredi», - deıdi ol.
Bul profesor Salehtiń Almaty Qalalyq kardıologıalyq ortalyǵynda ótkizgen TAVI boıynsha ekinshi master-klasy. Alǵashqysy 2024 jyldyń jeltoqsanynda ótip, onyń barysynda tórt ota jasalǵan bolatyn.
Sol kezde ortalyq dırektory Roza Qýanyshbekova aralasýdan keıingi alǵashqy kúnderdiń ózinde pasıentterdiń jaǵdaıy edáýir jaqsarǵanyn atap ótken.
«Mundaı shara Qalalyq kardıoortalyqtyń halyqaralyq ıntervensıalyq kardıologıa keńistigindegi bedelin arttyryp, joǵary tehnologıalyq medısınalyq kómekti zamanaýı standarttarǵa saı damytýǵa jol ashady», – dep túıindedi Amına Rakısheva.