«Zańger» alaıaqtardyń sqemasy qandaı?
Bul týraly aqshamnews.kz Stopfake.kz-ke silteme jasaı otyryp habarlaıdy.
Sqema qalaı jumys isteıdi?
Bul alaıaqtyq ádisi eki bólikten turady.
Birinshisi – alaıaqtyqtyń ózi. Sqema ártúrli bolýy múmkin: «bank qyzmetkeri», «polıseı» qońyraý soǵady nemese «tıimdi» ınvestısıalar jáne t.b. usynylady.
Ekinshisi – «zańgerler kómegi». Jábirlenýshimen ony tonap ketken alaıaqtarǵa qarsy sot isin daıyndap jatqan zań fırmasynyń atynan bireýler baılanysqa shyǵady. «Zańgerler» aqshany qaıtarýǵa kómektesetinderin aıtady. Olar bul isti aldaǵy kúnderi sotqa beremiz, sondyqtan, ujymdyq talap-aryzǵa qosylyp, zańgerler tobynyń qyzmetteri úshin dál qazir tólem jasaý kerek deıdi.
Shyn máninde ne bolady?
İs júzinde bul «zańgerler» – baıaǵy alaıaqtar. Olar jábirlenýshiniń sharasyz jaǵdaıyn paıdalanyp, odan taǵy da aqsha alýdy kózdeıdi.
Jalǵan zańgerlerdi qalaı tanýǵa bolady
Birneshe belgisi:
Olar sizdi ózderi taýyp alady.
Shynaıy zańgerler eshqashan alaıaqtyqtyń qurbandaryn ózderi izdep taýyp, qyzmetin usynbaıdy.
- Jalǵan zańgerler tek olar ǵana kómektese alady dep sendiredi.
Olar bul ispen burynnan aınalysyp jatqanyn, aqshany qalaı qaıtarýdy naqty biletinin aıtyp sendiredi. Basqa zańgerlerdiń kómegi tıimsiz bolady dep qorqytady.
- Asyqtyrady.
Sizdiń isińizdi ujymdyq sot isine qosý úshin jeńildik jasaýǵa jáne prosesti bir kúnge nemese tipti birneshe saǵatqa keshiktirýge de daıyn bolady. Biraq ol úshin mindetti túrde tólem jasaýyńyzdy suraıdy. Mundaı qysym jaǵdaıynda adam emosıaǵa berilip, alaıaqtardyń aılasyna ońaı túsip qalýy múmkin.
- Zańgerler tólemdi bank kartasyna aýdarýdy suraıdy.
Mundaı tólem zańsyz. Zań aıasynda jumys isteıtin zańger tólem jasaıtyn shot jiberedi, tólemdi POS-termınal arqyly qabyldaıdy nemese qolma-qol aqshamen alady, chek beredi.
Eger zańger jaldaǵym kelse, alaıaqqa tap bolmaý úshin ne isteý kerek?
- Quqyq qorǵaýshyny ózińiz tańdańyz. Jelidegi pikirlerdi oqyńyz nemese tanystaryńyzdan senimdi mamandy usynýyn surańyz. Ózi habarlasyp, qyzmetin tyqpalaǵan zańgerlermen jumys istemeńiz.
- Aqsha tólemes buryn kelisimshartqa otyryńyz. Eń durysy – zańgerdiń keńsesinde jeke kezdesip, resmı túrde rásimdeý.
- Kartadan kartaǵa aýdarym arqyly tólem jasamańyz.
Emosıaǵa erik bermeı, sabyr saqtap, baıyppen áreket etseńiz – jalǵan zańgerdi taný qıyn emes.
«Kaspi.kz alaıaqtarǵa qarsy» naýqany aıasynda osyndaı jalǵan zańgerlerdiń jumysy týraly jańa rolık shyqty. Onda alaıaqtardyń qalaı áreket etetini kórsetilgen.