Osy aptada qalamyzda bolǵan mańyzdy jańalyqtarǵa sholý.
Medeýdiń mańyzdy qadamy
Almaty qalasynyń ákimi Erbolat Dosaev Medeý aýdanynyń turǵyndarymen kezdesti. Kezdesýde Taýly qyrat shaǵyn aýdanynda, ál-Farabı dańǵylynan joǵary ornalasatyn jańa Kongres-ortalyqtyń qurylysy týraly aı̆tyldy. Byltyr aýdanda 65 shaqyrym kabeldik jeli aýystyryldy, 10 myń jańa sham jáne 185 baǵana ornatyldy.
Qalanyń taýly aı̆maqtarynda kóshkin qaýpi artyp keledi, osy máseleni júı̆eli túrde sheshý úshin taý bókteriniń eńisi 15 gradýstan asatyn ýchaskelerde qurylys júrgizýge tyı̆ym salyndy.
Mektepke deı̆ingi mekemeler jelisin keńeı̆tý boı̆ynsha da belsendi jumystar júrgizilýde. 2024 jyly Almatyda 720 oryndyq 14 jeke balabaqsha ashyldy, al 2025 jyldyń sońyna deı̆in taǵy 500 orynǵa arnalǵan 10 balabaqsha ashý josparlanyp otyr. 2025 jyldyń aqpanynda «Dýman-2» shaǵyn aýdanynda 320 oryndyq jeke balabaqshanyń qurylysy bastalyp, 2026 jyldyń aqpanynda ashylady. 2025 jyldyń sáýirinde №195 balabaqshanyń kúrdeli jóndeýi men seı̆smıkalyq kúsheı̆tý jumystary aıaqtalady. Aýdanda jańa perzenthana men jedel járdemniń qosalqy stansıasy salynady.
Almatyǵa Ǵanı Beısembaev keldi
Shaharǵa jumys saparymen kelgen Oqý-aǵartý mınıstri Almatyda mınıstrlikke qatysty uıymdardyń basshylarymen jınalys ótkizdi.
Memleket basshysynyń tapsyrmasymen Almatyda «ABAI ULTTYQ MEKTEBI» alǵashqy ulttyq mektebiniń qurylysy bastaldy.
Ǵanı Beısembaev Almaty qalasyndaǵy RFMM-niń jumysymen tanysty.
Almaty Ramazan aıyna daıyn
Almaty qalasynyń bas ımamy Tólebı qajynyń aıtýynsha, qaladaǵy barlyq meshitterde taraýıh namazdary oqylyp, Quran hatym túsiriledi. Jamaǵattyń yńǵaılylyǵy úshin Almaty Ortalyq meshitinde «Ramazan shatyryn» ornatý josparlanyp otyr. Onda kún saıyn 450 adamǵa tegin aýyzashar beriledi.
Jármeńkede bári bar
Qalada ár senbi jáne jeksenbi kúnderi saǵat 9:00-den 18:00-ge deıin demalys kúnderiniń jármeńkeleri ótedi. Daıyn ónimderdiń baǵasy Almaty qalasynyń ortasha naryqtyq baǵasynan 10-15% tómen.
«...Eshteńe de umytylmaıdy»
Almatyda 28 gvardıashy-panfılovshylar atyndaǵy saıabaqtaǵy Dańq memorıaly aýmaǵynda qalpyna keltirý jumystary qolǵa alyndy. Bul jumystar Uly Otan soǵysyndaǵy Jeńistiń 80 jyldyǵyn atap ótýge oraı̆ uı̆ymdastyrylǵan.
Saqtansań saqtaıdy
Almaty órt qaýpine daı̆yndyqty kúsheı̆tip, tehnıkany jańartýda. 2025 jylǵa qaraı̆ avıasıalyq bólimsheniń shtaty tolyq jasaqtalǵan, qyzmetkerler medısınalyq tekseristen jáne teorıalyq daıarlyqtan ótti.
Kúıden daýyl turǵyzǵan
Qazaqstannyń Halyq artısi Nurǵısa Tilendıevtiń 100 jyldyǵyna oraı, «Nurǵısa jylynyń» saltanatty ashylýy ótti. Aıtýly is-sharaǵa oraı, Almaty qalasy mýzeıler birlestigine qarasty Nurǵısa Tilendıev memorıaldy mýzeıiniń jyljymaly kórmesi uıymdastyrylyp, 70-ke jýyq eksponat qoıyldy.
10 jyldan keıingi rekord
Bul rekordty ornatqan – 20 jastaǵy almatylyq mánerlep syrǵanaýshy Mıhaıl Shaıdorov. Ol jaqynda ǵana Harbındegi Azıa oıyndarynda úshinshi nátıje kórsetken edi. Endi mine, Seýlde «Tórt qurlyq» týrnırinde aldymen qysqa baǵdarlamany, sodan keıin erikti baǵdarlamany jeńip aldy. Sondaı-aq, ol óz ónerimen jarystyń shymyldyǵyn japty.
Osydan týra 10 jyl buryn dál osy arenada taǵy bir almatylyq Denıs Ten jeńimpaz atanǵan edi.
Aq alǵys aqtarylatyn kún
Alǵys aıtý merekesine oraı, Almatyda kóptegen mádenı-áleýmettik is-sharalar josparlanǵan:
- 25 aqpan – Qazaqstan halqy Assambleıasynyń etnomádenı birlestikteriniń shyǵarmashylyq ujymdarynyń konserti.
- 28 aqpan – «Zolotye gody» qarttar úıinde qart adamdarǵa arnalǵan qaıyrymdylyq túski as.
- 1 naýryz – Qazaqstan halqy Assambleıasy Analar keńesiniń qolóner kórmesi (Respýblıkalyq Dostyq úıi), Nemis úıinde «Ártúrli shyǵý tegi – teń múmkindikter» otbasylyq qonaq bólmesi, sondaı-aq muqtaj jandarǵa kómek kórsetýge arnalǵan qaıyrymdylyq aksıalary.
- 2 naýryz – Medeý aýdanynyń Komúnıtı ortalyǵynda fleshmob.
«Aıyldyń arǵy jaǵynan...»
Almaty jastar saıasaty salasynda halyqaralyq baılanystardy nyǵaıtýǵa erekshe kóńil bólýde. Osy maqsatta ońtústik astanaǵa Qyrǵyz Respýblıkasynyń jastar delegasıasy arnaıy saparmen keldi. Delegasıa quramynda Qyrǵyz parlamentiniń, Mádenıet mınıstrliginiń jáne jastar saıasatyna jaýapty qurylymdardyń ókilderi bar.
Jetim kórseń, jebeı júr
105 almatylyq otbasy 158 jetim balaǵa jylýlyq pen qamqorlyq syılady.
Almatyda ata-ana qamqorlyǵynsyz qalǵan balalardy qoldaýǵa baǵyttalǵan bastamalar qarqyndy damyp keledi. Osy joba iske qosylǵannan beri 2285 adam mamandardan keńes alyp, al 818 azamat Qabyldaýshy ata-analar mektebinde daıyndyqtan ótti. Osy baǵdarlamanyń nátıjesinde 105 almatylyq otbasy 158 jetim balany óz qanatynyń astyna aldy.
Azamattyq qorǵanys kórmesi
1 naýryzda Almaty qalasynyń Tótenshe jaǵdaılar departamenti (TJD) azamattyq qorǵanys salasyndaǵy mańyzdy is-shara ótkizedi. "Astana" alańynda uıymdastyrylatyn kórme barysynda órt sóndirý, qutqarý jáne medısınalyq qural-jabdyqtar kópshilik nazaryna usynylady.