Qazaqstan Respýblıkasynyń Premer-mınıstri Oljas Bektenov vıse-premer – ulttyq ekonomıka mınıstri Serik Jumanǵarınmen jáne qarjy mınıstri Mádı Takıevpen jumys keńesin ótkizdi. Salyq-búdjet reformasy jáne salyq túsimderin baqylaýdy kúsheıtý máseleleri qaraldy, dep habarlaıdy aqshamnews.kz
Qarjy mınıstri Mádı Takıev júrgizilgen taldaý sheńberinde josyqsyz salyq tóleýshilerdiń salyq mindettemelerin ońtaılandyrýdyń quqyqtyq sqemasy retinde shaǵyn kásipkerlikti qoldaý jáne damytý maqsatynda buryn engizilgen arnaıy salyq rejımderin (SRP) paıdalaný faktileri anyqtalǵanyn baıandady.
Búginde elimizde 2,3 mln salyq tóleýshi tirkelgen. Onyń 8%-y nemese 137 myńy ǵana – QQS tóleýshiler. Jalpy sýbektiler sanynyń 81%-y ońaılatylǵan deklarasıany paıdalana otyryp, arnaıy salyq rejıminde jumys isteıdi, al olardyń 85%-y 15 mln teńgege deıingi kiristerdi kórsetedi.
«Biz arnaıy salyq rejımderin qoldanatyn sýbektilerdiń jalpyǵa birdeı belgilengen rejımde jumys isteıtin kompanıalarmen ózara esep aıyrysýlaryna taldaý jasadyq. Taldaý kórsetkendeı, mundaı rejımder arasyndaǵy ózara esep aıyrysý ótken jyly 2 esege – 5 trln-nan 10 trln teńgege deıin ósti. Bul rette arnaıy salyq rejımderi boıynsha 16 trln teńgeniń jalpy aınalymynan jalpyǵa birdeı belgilengen rejımmen ózara esep aıyrysý 10 trln teńgeni quraıdy. Iaǵnı, júzdegen mıllıard teńge tabys taýyp, salyq tóleýshiler az ǵana salyq tóleıdi», — degen Mádı Takıev bıznes paıdalanatyn birqatar bólshekteý sqemalaryn aıtty.
Salyqtardy ońtaılandyrý jáne paıdany azaıtý úshin kompanıalar «qujattyq» shyǵyndardy arttyrý prınsıpin ustanady. Bir kompanıa taýarlardy satyp alady jáne ony ońtaılandyrylǵan rejımde jumys isteıtin basqa zańdy tulǵaǵa ózindik quny boıynsha qaıta satady. Nátıjesinde, birinshi kompanıa shyǵyndy kórsetse, al ekinshisi jeńildik sharttaryn paıdalana otyryp, QQS tóleýden jaltaryp otyr.
Sonymen qatar bıznesti birneshe zańdy tulǵalarǵa bólý ádisi qoldanylýda. Mysaly, bir mekemede bar, asqana jáne karaoke jeke kompanıa retinde tirkelgen nemese qonaq úıdiń ár qabaty ártúrli jeke kásipkerge tıesili. Olardyń biriniń tabysy 78 mln teńge shegine jetkende, qyzmeti toqtatylady, al onyń ornyna basqa zańdy tulǵa kelip, bul QQS tóleýden jaltarýǵa múmkindik beredi.
«Eńbekaqy qoryna túsetin júktemeni azaıtý úshin kásiporyn qyzmetkerleri shtattan shyǵarylyp, jeke kásipker retinde tirkelip, burynǵy jumys berýshige jumysshy retinde emes, jeke tulǵa retinde qyzmet kórsetedi. Tıisinshe, eńbekaqy tóleý qoryna túsetin salyq tólemderi azaıyp, jumys berýshiden áleýmettik jaýapkershilik alynyp tastalady, odan ári ony kásipker óz moınyna alady», — dedi Mádı Takıev.
Osyǵan baılanysty QR Qarjy mınıstrligi salyqtyq ákimshilendirýdi jetildirý maqsatynda bólshekteýge qarsy kúres boıynsha birqatar shara usynady:
-
-
bıznestiń bólshektenýiniń zańnamalyq krıterııin engizý;
-
salyq daýlarynda nysannan mánniń basym bolý qaǵıdatyn engizý;
-
mundaı faktilerdi baqylaý jáne dáleldeý ádisterin engizý;
-
jeke kásipkerler úshin qyzmet túrlerin shekteý.
-
«Qarjy mınıstriniń aqparatynan salyq júktemesin ońtaılandyrýdyń ártúrli sqemalaryn qoldana otyryp, mindetin adal atqarmaıtyn kásipkerlerdiń baryn kórip otyrmyz. Mıllıardtaǵan aınalymmen olar búdjetke ózderiniń tapqan paıdasyna múldem sáıkes kelmeıtin somalardy tóleıdi. Bizde osyndaı iri kompanıalardyń tolyq tizimi bar. Ol tizimde BI Group, BAZIS jáne basqa da kóptegen iri qurylys kompanıalary júr. Ekonomıkanyń basqa salalarynda jumys isteıtin belgili ári tanymal meıramhanalar, fıtnes-klýbtar jáne ártúrli kompanıalar bar.
Osy múmkindikti paıdalana otyryp, men qazir salyq júktemesin ońtaılandyrýdyń túrli sqemalaryn qoldanatyn iri kompanıalardyń ıeleri men basshylaryna qarata aıtqym keledi. Búgin-erteń sizderdiń kompanıalaryńyzǵa salyq organdarynan qosymsha salyq somalaryn tóleý qajettiligi týraly habarlamalar kelip túsedi. Barshadan eki apta ishinde salyq organdaryna qosymsha salyq deklarasıalaryn tapsyrýdy jáne ádiletti salyq somasyn tóleýdi suraımyn.
Eger bul áreketter jasalmasa, onda memleket fıskaldyq jáne quqyq qorǵaý organdaryn qosqanda, memleket ıeligindegi barlyq resýrstardy qoldaný quqyǵyn ózine qaldyrady.
Talap qatań bolady, biraq eger bıznes memleket aldyndaǵy mindettemesin ádiletti túrde oryndasa, biz dıalog qurýǵa daıynbyz», — dep atap ótti Oljas Bektenov.