Búginde qaı etnos bolsyn, bári de elimizde qalaǵan jumysymen aınalysyp, óz tilin, mádenıetin, salt-dástúrin saqtap, órkendete alady. Qushaǵy ystyq, peıili keń qazaq eli eshkimdi keýdesinen ıtermek emes. Sebebi, bul bizdiń babamyzdyń qanymen kele jatqan iri qasıet. Sondyqtan bizdi meken etip jatqan basqa etnos ókilderiniń ósip, ónip, kóktep otyrǵan jerine alǵys bildirýi oryndy.
Alǵys aıtý kúni jaqyndap keledi. Jyly sóz, iltıpat, túzý peıil adam janyn nurǵa toltyrady, jaqsylyqtarǵa bastaıdy. Qazaq jerine árdaıym ystyq yqylasyn bildirýden tartynbaıtyn jany izgi jandardyń qatarynda almatylyq otandasymyz, kúrd dıasporasynyń kórnekti ókili, mesenat, qoǵam qaıratkeri Rafık Iakýbogly Mırzoev ta bar. Ol birneshe tildi meńgergen, sonyń ishinde qazaq tiline de jetik.
Sondaı-aq, ol kópmádenıetti, kópetnosty memleketimizdegi konfesıaaralyq jáne etnosaralyq kelisimdi nyǵaıtý jolynda únemi azamattyq ustanymyn bildirip, megapolıste ótetin mádenı-rýhanı keshterdiń, qaıyrymdylyq is-sharalardyń belortasynan tabylyp júredi.
Taqyrypqa oraı
Rafık MIRZOEV, «Qurmet» ordeniniń ıegeri, mesenat, qoǵam qaıratkeri:
Men baqyttymyn!
Qazaqstan halqynyń, qazaq aǵaıyndardyń ortasynda ómir súrip, osy elden óz ornymdy tapqanyma rızamyn. Maǵan ǵana emes, talaı etnosqa qutty qonys, jyly uıa bolyp otyr. Bárimiz beıbit tańmen talasa turyp, óz tirligimizben alańsyz aınalysyp, keshke shańyraǵymyzǵa aman-esen oralýdyń ózi bir baqyt. Al eshkimmen arazdaspaı, jaıly, tolyqqandy ómir súrý – myń baqyt. Osynaý tynysh ómirdiń arqasynda Qazaqstan ósý, órkendeý jolynan taımaq emes.
Bizdiń Qazaqstan halqy Assambleıasy elimizde oryn alǵan tótenshe jaǵdaılardan eshqashan syrt qalǵan emes. Barlyq etnos birige ketip, sýǵa ketken aımaqtardaǵy otandastyrymyzǵa úı salyp berýge kómektesti. Osynaý syn saǵattarda kópbalaly otbasylardyń, múmkindigi shekteýli jandardyń, qarttardyń janynan tabyla bildik. Bizdiń birligimiz, nıetimiz osyndaı sátterde kórinedi. Biz ózimiz de osylaısha kóptiń alǵysyn arqalap júrmiz. Alǵys aıtý kún bizdi burynǵydan da jaqyndastyra túsedi dep oılaımyn.