Almatyda Qarasý kóliniń túbinen 53 tonna qoqys shyǵaryldy
Almaty qalasynyń ákimi Erbolat Dosaev Alataý aýdanyndaǵy jumys sapary barysynda Qarasý kólin tazartý jumystarynyń nátıjesimen tanysty, dep habarlaıdy aqshamnews.kz
Qarasý shaǵyn aýdanynyń turǵyndary kóldi tazartý týraly qala ákiminen kómek suraǵan bolatyn. Erbolat Dosaevtyń tapsyrmasymen Balqash-Alakól baseındik ınspeksıasymen kelisilgen joba ázirlendi. Sý qoımasyn mehanıkalyq tazalaýdy merdiger – «TOLAGAI-2050» JSHS-2023 jyldyń naýryz aıynda bastap, qyrkúıekte aıaqtaýǵa tıis edi. Alaıda jobanyń aıaqtalý merzimi bıylǵy jyldyń tamyzyna aýystyryldy, sebebi túbindegi laıdyń qalyńdyǵy jobalaý kezinde boljanǵannan birneshe ese kóp bolyp shyqty (30 sm ornyna 100-120 sm). Sonymen qatar, aýyr tehnıkanyń ótýi úshin kóldiń túbinen ýaqytsha jol salý qajettiligi de merzimge áser etti. Bastapqyda tazartý jumystaryn topyraq qatqan qys mezgilinde júrgizý josparlanǵan edi.
Kóldi tazartý jumystary aıaqtalǵan soń ýaqytsha jol laımen birge shyǵaryldy. Aıta ketý kerek, bul jumys toǵan tarıhynda alǵash ret júrgizildi. Sonyń nátıjesinde kóldiń túbinen 53 tonna qoqys jáne 10 myń tekshe metr laı shógindisi shyǵaryldy. Sonymen qatar, sý deńgeıin retteý jáne onyń jaǵaǵa asyp ketýin boldyrmaý úshin sý aǵyzý qurylystary salyndy.
Joba qalalyqtardyń shaǵymdanǵan birneshe máselesin sheshýge múmkindik berdi: birinshi kezekte, tazartý arqyly sý aıdynynyń ekologıalyq tepe-teńdigi men bıologıalyq alýan túrliligi qalpyna keledi. Kól turǵyndar men qala qonaqtary úshin qaıtadan demalýǵa yńǵaıly orynǵa aınalady.
Sapar barysynda Qarasý shaǵyn aýdanynyń turǵyndary kóldi tazartý jumystary úshin alǵys bildirip, ákimnen sý qoımasy mańynda jaıaý júrginshiler aımaǵyn salýdy ótindi. Buǵan jaýap bergen Almaty ákimi Erbolat Dosaev óziniń tapsyrmasymen sportpen shuǵyldanýǵa arnalǵan serýendeý jáne belsendi demalys aımaqtaryn salýdy qamtıtyn kóriktendirý jobasy ázirlenetinin aıtty.
