Áıelderdiń zeınetkerlikke 61 jasynda shyǵatyny habarlandy.
Óńirlik komýnıkasıalar qyzmeti alańynda QR Prezıdenti qyrkúıek aıyndaǵy Joldaýynda zeınetaqy júıesiniń tıimdiligin arttyrý boıynsha jańa sharalar paketin túsindirý boıynsha brıfıń ótti, dep habarlaıdy Almaty-akshamy.kz
Eńbek jáne áleýmettik qorǵaý komıtetiniń Almaty qalasy boıynsha departamenti basshysynyń áleýmettik máseleler jónindegi orynbasary Rızvangýl Daraeva áıelder zeınetkerlikke 61 jasynda shyǵatynyn habarlady.
«Joldaý sharalarynyń biri 2023 jyldan bastap áıelderdiń zeınetkerlik jasyn 61 jas deńgeıinde 5 jylǵa josparlanǵan arttyrýdy toqtata turýmen baılanysty boldy. Bul sheshim koronavırýstyq pandemıanyń azamattardyń densaýlyǵy men ómir súrý uzaqtyǵyna teris áserin eskere otyryp qabyldandy. Kelesi 5 jyl ishinde densaýlyq saqtaý júıesin jaqsartý jóninde sharalar qabyldanatyn bolady. Bul rette aýyl medısınasyna, azamattardyń densaýlyǵyn qalpyna keltirýge jáne qoldaýǵa baǵyttalǵan ońaltý ortalyqtary jelisin qurýǵa jáne keńeıtýge erekshe nazar aýdarylatyn bolady», - dedi Rızvangýl Daraeva.
Sonymen qatar, Prezıdent Joldaýynda zeınetaqy júıesiniń tıimdiligin arttyrý týraly aıtyldy. 2023 jylǵy 1 qańtardan bastap 2027 jylǵa deıin eń tómengi bazalyq zeınetaqy mólsherin eń tómengi kúnkóris deńgeıiniń 54%-ynan 70%-yna deıin, eń joǵarǵysyn – tıisinshe 100 %-dan 120 %-ǵa deıin kezeń-kezeńimen jetkizý.
Osy kezeńde bazalyq zeınetaqy mólsheri orta eseppen 51%-ǵa deıin artatyn bolady. Bul rette, bazalyq zeınetaqynyń ortasha mólsheriniń jyl saıynǵy ósýi shamamen 13%-dy qurap, barlyq 2 mln zeınetkerdi qamtıdy.
Usynylyp otyrǵan sharalar 2025 jylǵa qaraı jıyntyq zeınetaqyny orta eseppen 27%-ǵa ósirýge (3 jyl ishinde – 109 myńnan 138 myń teńgege deıin) jáne jıyntyq zeınetaqydaǵy memlekettik tólemderdiń úles salmaǵyn arttyrýǵa múmkindik beredi. Osylaısha, memleket qart adamdar arasynda kedeıliktiń ósýine jol bermeý úshin sharalar qabyldaıdy.
Sondaı-aq Rızvangýl Daraeva BJZQ-nyń jańa ınvestısıalyq strategıasy ázirlenetinin habarlady.
«Jınaqtaýshy zeınetaqy júıesiniń qarjylyq turaqtylyǵyn qamtamasyz etý jáne azamattardyń zeınetaqy jınaqtarynyń tabystylyǵyn arttyrý maqsatynda zeınetaqy aktıvterin tıimdi basqarýdy arttyrý boıynsha sharalar qabyldanatyn bolady. Bul rette BJZQ-nyń jańa ınvestısıalyq strategıasyn ázirleý jáne zeınetaqy aktıvterin basqarýǵa ınvestısıalaýda úlken tájirıbesi bar kásibı jáne ashyq jeke kompanıalardy tartý josparlanýda», - dep jalǵastyrdy spıker.
Búginde azamattardyń zeınetaqy aktıvteriniń búgingi kólemi 13 trln teńgeden asty, BJZQ ınvestısıalyq portfeliniń tabystylyǵy ótken jyl úshin 11,13%-dy qurady.