Almatyda otbasylardy qoldaý modeli túsindirildi.
«Memlekettik áleýmettik saqtandyrý qory» AQ Almaty qalasy boıynsha fılıalynyń dırektory Lázzat Saǵynbekova Óńirlik komýnıkasıalar qyzmetiniń brıfıńinde sóılegen sózinde bala kútimi kezeńi 1 jastan 1,5 jasqa deıin ósetinin habarlady. Bul Memleket basshysynyń óz Joldaýynda aıtqan bastamasynyń nátıjesinde bolady, dep habarlaıdy Almaty-akshamy.kz.
Lázzat Saǵynbekovanyń aıtýynsha, búginde balaly otbasylardy qoldaý modeli memlekettik járdemaqylar men tólemderdiń 6 túrin qamtıdy. Áleýmettik kodeks jobasynda osy áleýmettik qoldaý sharalarynyń barlyǵy tolyq saqtalǵan. Alaıda, otbasynyń jekelegen sanattaryn qoldaýdyń qoldanystaǵy sharalaryn kúsheıtýge baǵyttalǵan birqatar jańalyqtar engizilýde.
«Eń negizgileriniń biri – bala kútimi boıynsha járdemaqy tóleý merzimin bir jyldan bir jarym jasqa deıin ulǵaıtý. Osy rette, atalǵan norma jumys isteıtin jáne jumys istemeıtin ata-analarǵa da qoldanylady. Bul quqyqty jarty mıllıonǵa deıin ata-ana paıdalanatyn bolady. Oǵan qosa, bala kútimi boıynsha járdemaqy alýǵa úmitker árbir ata-ana onyń áleýmettik saqtandyrý júıesine qatysý ótili neǵurlym kóp bolsa, tólem mólsheri soǵurlym joǵary bolatynyn bilýge tıis. Bul tólem búginde MÁSQ-ǵa aýdarymdar júrgizilgen tabystyń 40%-yn quraıdy», - dep habarlady ÓKQ spıkeri.
Al jumys istemeıtin nemese bala týylǵanǵa deıingi sońǵy eki jylda 6 aıdan kem jumys ótili bar ata-analar járdemaqy men tólemderge tek memlekettik búdjetten ǵana úmitker bola alady.
«Búginde, bala kútimin atqaratyn ata-ana eńbek qyzmetin qaıta bastaǵan jaǵdaıda, bala kútimine tólenetin járdemaqy toqtatylýǵa qajet. Jańa Kodeks boıynsha osy sanattaǵy otbasylardy qoldaý úshin tólemder toqtatylmaıdy jáne respýblıkalyq búdjetten tólenetin járdemaqy mólsherine sáıkes tólenedi», - dep túsindirdi spıker.
Sondaı-aq, Memleket basshysynyń tapsyrmasy boıynsha 2022 jylǵy 1 qyrkúıekten bastap pılottyq rejımde Otbasynyń sıfrlyq kartasyn engizý bastaldy.
«Karta – bul azamattardyń áleýmettik mártebesine baılanysty kepildi memlekettik qoldaýdyń qandaı da bir túrin alýǵa quqyqtary týraly olardyń kún saıynǵy «elektrondyq habarlaýshysy». Memleketpen qyzmet kórsetýdiń proaktıvti formatynyń taǵy bir jańa quraly. Iaǵnı, memleket aqparattyq júıe arqyly azamatqa tıisti organdarǵa júginý qajettiliginsiz memlekettik qoldaýdyń qandaı da bir túrin alýdy ózi usynatyn bolady», - dedi L. Saǵynbekova.
Bastapqy kezeńde memlekettik organdardyń aqparattyq júıeleriniń derekteri negizinde otbasylardyń ál-aýqatynyń deńgeıin jáne olarǵa tıisti memlekettik qoldaý sharalaryn aıqyndaý boıynsha jumys júrgizildi.
Qazirdiń ózinde sıfrlyq kartada shamamen 6 mln otbasy men onyń 19 mln múshesi týraly derekter bar jáne «otbasy portreti» dep atalatyn málimetter qalyptastyryldy. Karta derekteri otbasy jáne onyń músheleri mártebesiniń ózgerýine qaraı jańartylady.
Memlekettik qoldaý sharalaryn alý quqyǵy anyqtalǵan kezde áleýetti alýshyǵa memlekettik qyzmet kórsetýge kelisim alý úshin SMS-habarlama jiberiledi.
Kelisim alǵannan keıin – áleýmettik járdemaqy, tólemder nemese memlekettik qoldaýdyń basqa túrleri taǵaıyndalyp, keıinnen alýshynyń bank shotyna aýdarylady.
Joba kezeń-kezeńmen júzege asyrylady:
- 2022 jylǵy 1 qyrkúıekten bastap járdemaqylar men áleýmettik tólemderdiń 9 túri boıynsha jańa formatta qyzmetter alý múmkindigi usynyldy;
– 2023 jylǵy 1 qańtardan bastap tizbe áleýmettik qorǵaý salasyndaǵy qyzmettermen keńeıtiletin bolady;
- 2024 jylǵy 1 qańtardan bastap densaýlyq saqtaý jáne bilim berý salalaryndaǵy memlekettik kepildikter engiziletin bolady;
- 2025 jyldan bastap memlekettik kepildikterdiń barlyq túrleri qamtylatyn bolady.