Saılaý datasy belgilengennen keıin eki aıdyń ishinde saılaý ótkiziletin bolady.
QR Ádilet mınıstri Qanat Mýsın aldaǵy kúzde ótýi tıis kezekten tys Prezıdent saılaýynyń datasyna qatysty saýalǵa jaýap berdi, dep habarlaıdy Almaty-akshamy.kz QazAqparatqa silteme jasap.
«Memleket basshysy óziniń Joldaýynda jarıa etkendeı, kezekten tys saılaý osy jyldyń kúzinde ótetin bolady. Saılaýdyń naqty qaı kúni ótetinin Prezıdent Jarlyǵymen jarıa etedi. Saılaý datasy belgilengennen keıin eki aıdyń ishinde saılaý ótkiziletin bolady», - dedi Qanat Mýsın Parlament palatalarynyń birlesken otyrysynan keıin BAQ ókilderiniń saýalyna oraı.
Aıta keteıik, búgin depýtattar «Qazaqstan Respýblıkasynyń Konstıtýsıasyna ózgerister men tolyqtyrý engizý týraly» QR Zańyn qabyldady.
Oǵan sáıkes, Prezıdenttiń mandaty qaıta saılaný múmkindiginsiz bir merzimge shektelip, jeti jyl merzimge uzartylady; Nur-Sultan qalasynyń ataýy qaıtadan Astana bolyp ózgeredi;
Konstıtýsıalyq Sot sýdıalarynyń ókilettik merzimi 8 jylǵa deıin ulǵaıtylady.