Megapolıste kezekte turǵandardyń sany artyp keledi. Bul týraly Óńirlik komýnıkasıalar qyzmetiniń baspasóz konferensıasynda Almaty qalalyq jaıly orta basqarmasynyń basshysy Sapar Nurashev habarlady. Ol bıyl qansha qala turǵynynyń baspanaly bolǵanyn aıtty, dep habarlaıdy almaty-akshamy.kz
2021 jyly kezekte turǵandardyń tizimi «Nurly jer» memlekettik baǵdarlamasy aıasynda myńdaǵan qala turǵyny áleýmettik turǵyn úımen qamtamasyz etilgendikten, aıtarlyqtaı qysqardy.
«Bıyl jalpy aýdany 248,5 myń sharshy metr nemese 3 959 páter paıdalanýǵa berý jospary bekitildi, onyń ishinde 1 892 páter «satyp alý quqyǵynsyz jalǵa berý» jelisi boıynsha jáne 2 067 páter «bank salymshylary men JAO-da kezekte turǵandar úshin kredıttik turǵyn úı» jelisi boıynsha. Biz «Otbasy bankimen» birlesip, memlekettik baǵdarlamany júzege asyryp jatyrmyz», - dedi Sapar Nurashev.
Mysaly, bıyl Naýryzbaı aýdanynyń «Alma sıtı-5» TK-de 37 úı nemese 1 110 páter salyndy. Osy aýdanda ınvestor qarjysy esebinen «KazahStroı» JSHS 1 200 oryndy mekteptiń qurylysy bastaldy.
Sonymen qatar, Alataý aýdanyndaǵy «Mádenıet» TK-de tórt úı nemese 144 páter salyndy, munda 160 oryndyq balabaqshanyń qurylysy josparlanǵan.
«Bul úılerdiń barlyǵy paıdalanýǵa berildi, kezekte turǵandardyń bir bóligi páterlerin aldy. Mysaly, «Alma Sıtı-5» turǵyn úı keshenine 227 az qamtylǵan kóp balaly otbasy jáne 440 kezekte turǵan «Otbasy bankiniń» salymshylary qonystandy», - dep jalǵastyrdy sózin Sapar Nurashev.
Qazirgi ýaqytta Túrksib aýdanynyń «Jas Qanat-2» TK qurylys-montajdaý jumystary jalǵasýda. Munda egjeı-tegjeıli josparlaý jobasymen toǵyz qabatty 41 úıdiń qurylysy qarastyrylǵan, onyń ishinde jyl sońyna deıin 2 705 páterlik 35 úı salynady. Qalǵan alty kóp qabatty úı 2022 jyly salynady.
«Jas Qanat-2» TK aýmaǵynda 260 oryndyq balabaqsha, 340 adam qabyldaıtyn emhana jáne 1 500 oryndyq mektep salynady. Qurylys 2022-2023 jyldary aıaqtalady.
Sóziniń sońynda S. Nurashev Almatyda qala turǵyndarynyń turǵyn úı jaǵdaıyn jaqsartý boıynsha jumys jalǵasatynyn, óıtkeni bul qala ákimdigi jumysynyń strategıalyq baǵyttarynyń biri ekenin atap ótti.