Tsıtrustyq ósímdíktíń gúldep, búrshík jaryp, kógeruí men písíp jetíluíne 9 aıdaı uaqyt ketedí
Almaty tūrǵyny Anna Bashırskaya qalada alǵashqy bolyp lımon ósírgen. Qojalyq ıesí 26 jyldan berí qajyrly qyzmet etíp, endí sol eńbegíníń jemísín teríp alyp júr. Ol ósírgen lımonarıı ár 9 aıda 5-6 tonna óním beredí, dep habarlaıdy Almaty-akshamy.kz
Onyń kóshetí jylyjaıǵa 1986 jyly Ózbekstannan ákelíngen eken. Bastapqyda tropıkalyq aımaqtarda ósetín jemístí Almatyda jersíndíru ońaıǵa soqpapty. Dese de, mamandar búgínde lımondy baptaudyń qyr-syryn ábden meńgeríp alǵan.
Lımon aǵashynyń nyǵaıyp, jemís beruí úshín ony 5 jylǵa deıín kútíp-baptau kerek. Al bír túptíń ózínen orta eseppen 50-60 kelíge deıín lımon teríp aluǵa bolady. Būl ósímdíktíń eń bír artyqshylyǵy – onyń ónímí jyldan-jylǵa kóbeıe beredí.
Lımondy baptau úshín asa tózímdílík pen eńbeksúıgíshtík kerek. Sebebí mamandar aılar boıǵy jūmystyń nátıjesín negízínen qazan-aqpan aılarynda ǵana kóredí eken.
«Jylyna bír ret gúldeıdí. Qazír dál óním jınaıtyn kezeń bastaldy. Keıde sáuírge deıín lımon teríp aluǵa bolady. Odan keıín aǵashtyń japyraqtary túsíp, qaıta kókteıdí. Jalpy jemís beru protsesí qaıta bastalady», – dedí lımonarıı qyzmetkerí Sabılya Jaqsybaeva.
Lımonarıı ónímderín tek jylyjaıǵa tıesílí dúkennen ǵana satyp aluǵa bolady. Qojalyq ıelerí odan ózge, úı ósímdíkterí jáne askók pen aqjelken ósíredí. Ár ósímdíkke erekshe kútím qajet deıdí jylyjaı qyzmetkerlerí.
Kásíp ıelerí lımonnyń būl túrín asyldandyryp, joǵarǵy sortyn ósírudí maqsat etíp otyr. Onymen qosa, qaladaǵy lımonarıı sanyn kóbeıtpek nıette.
Elímízge lımon negízínen Ózbekstan, Tájíkstan, Grekıyadan ákelínedí.