Balalardy qorǵaý kúnine arnalǵan aýqymdy qalalyq aksıa aıasynda №6 mektep-gımnazıasynda jappaı tańǵy jattyǵý ótti, - dep habarlaıdy aqshamnews.kz tilshisi.
Ul-qyzdar sapqa turyp, túrli jattyǵýlardy belsendi oryndady. Kóńildi mýzyka balalardyń qımylyna serpin berip, kishi synyp oqýshylary ózderinen úlkenderge des bermeı, bar yntasymen qatysqan. Balalardyń kóńilin kótergen jaıt — jazǵy demalystyń bastalýy men oqý jylynyń aıaqtalýy.
Oqýshylardy jazǵy demalystyń bastalýymen jáne kele jatqan merekemen mektep muǵalimderi men arnaıy kelgen qonaqtar quttyqtady. Olardyń ishinde – fýtzaldan Qazaqstan quramasy men almatylyq "Qaırat" komandasynyń burynǵy oıynshysy Serik Jamanqulov ta boldy.
Sportshy balalarǵa tek oqýda tabys emes, sonymen qatar myqty ári epti bolyp ósip, elge laıyqty azamat bolýdy tiledi.
"Búgingi tańǵy jattyǵý Balalardy qorǵaý kúnine arnalǵan respýblıkalyq aksıa aıasynda ótip jatyr. Bul – salaýatty ómir saltyn nasıhattaýdyń bir joly. Kishi jáne joǵary synyp oqýshylary sharaǵa úlken qyzyǵýshylyqpen qatysty", – dedi mektep-gımnazıa dırektory Aıdar Býıtov.
Jattyǵý aıaqtalǵan soń oqýshylar úıge asyqpaı, tanymal sportshydan qoltańba alyp, estelik sýretke tústi.
"Sport — tek densaýlyqtyń kepili emes, sonymen qatar tártipke baýlıtyn qural. Eń bastysy – balalardyń bos ýaqytyn paıdaly ótkizýine kómektesip, kóshe áserinen aýlaq ustaıtyn múmkindik", – dedi on dúrkin Qazaqstan chempıony.