Ońtústik astanadaǵy №2 Balalar qalalyq klınıkalyq aýrýhanasynyń neırohırýrgteri reseılik áriptesterimen tájirıbe almasty.
Sheberlik klasy barysynda bizdiń dárigerler reseılikterdi epılepsıaǵa Delalande ınovasıalyq ádisimen hırýrgıalyq ota jasaý tájirıbesimen tanystyrdy, dep habarlaıdy aýrýhananyń baspasóz qyzmeti.
Sheberlik klasy barysynda ota jasalǵan naýqastyń biri 11 jasta. Onyń epılepsıa dertine shaldyqqanyna birneshe jyl bolǵan. Kishkentaı kúninde alǵan ınsýltten mıda kısta men atrofıalyq ózgerister paıda bolypty. Saldarynan epılepsıaǵa qarsy dárilerdi ishkenine qaramastan kún saıyn qyryqqa deıin talmasy ustaıtyn. Ekinshi aýrýhana dárigerlerine júgingen ata-anasy talma sanyn qysqartý úshin oǵan shýnt ornatýdy surapty. Alaıda mamandar emniń basqa tıimdirek tásilin tańdap alypty.
«Biz EEG men ózge de zertteýler qorytyndysyn qarap shyǵyp rezektıvtik operasıa jasap, pasıenttiń talmasyn 75 prosentke deıin qysqartýǵa bolady degen sheshim qabyldadyq. Bul tujyrymymyzdy epıleptologtar da maquldady. «Tik gemısferotomıa» dep atalatyn ota sátti shyqty. Qazir bala bólimshege aýystyryldy, operasıadan keıingi em-domyn qabyldap jatyr», - deıdi №2 QBKA neırohırýrgi Azamat Jaıylǵanov.
Aıtýynsha, bul tehnıka anatomıalyq jaǵynan qoljetimdi otanyń biri ári onyń ózge hırýrgıalyq tásilderge qaraǵanda operasıadan keıingi asqyný yqtımaldyǵy tómen. Ota kishigirim tilik arqyly jasalatyndyqtan qan ketý qaýpin tómendetedi. Hırýrg maman navıgasıalyq júıeniń kómegimen áreket ete otyryp, mıdy zaqymdanǵan qabyqshaladayn ajyratyp ala alady.
Aıtýynsha, osydan bir aı buryn 2-aýrýhana neırohırýrgteri Sankt-Peterbýrg qalasynda epılepsıanyń eshbir dári kómektespeıtin rezıstentti túrimen aýyratyn 14 jastaǵy jasóspirimge ota jasaǵan. Sol kezde reseılik mamandar osy ádisti úırenýge qyzyǵýshylyq bildiripti. Osy tájirıbeni meńgerip, tehnıkany pysyqtaý maqsatynda reseılik neırohırýrg Aleksandr Kım Almatyǵa arnaıy ushyp kelip, birlesken operasıalarǵa qatysty.
«Epılepsıany hırýrgıalyq emdeý salasy únemi damý ústinde. Ýaqyt ótken saıyn operasıanyń jańa túrleri, tásilderi kóbeıip keledi. Sondyqtan bir ýaqyt kóshinen qalmaı, ózara tájirıbe almasyp otyrýymyz kerek. Qazaqstandyq neırohırýrgıa da qarqyndy damyp jatyr. TMD elderi arasynda Almatydaǵy №2 QBKA dárigerleriniń klınıkalyq tájirıbesi óte mol dep aıta alamyn. Sondyqtan biz buǵan deıin de qazaqstandyq áriptesterimizdi shaqyryp, olarmen tájirıbe almastyq, osy ádisti úırendik. Qazir otaǵa qatysyp, klınıkalyq tájirıbemdi baıytýǵa múmkindik aldym. Biz de mundaı otanyń túr-túrin jasaımyz, biraq ózgelerden úırenerimiz de az emes», - dedi Aleksandr Kım.
Aıtýynsha, bıyl basylyp shyqqan Reseı Federasıasynyń ulttyq nusqaýlyǵyna balalar neırohırýrgıasyna arnalǵan bap engen. Onyń avtory qazaqstandyq neırohırýrgter Marat Rabandıarov pen Azamat Jaıylǵanov.
Otandyq neırohırýrgter epılepsıany hırýrgıalyq emdeý barysynda Eýropanyń medısına salasyndaǵy ozyq tájirıbesin basshylyqqa alady. Ekinshi aýrýhana dárigerleri 2023 jyldyń qańtarynda Qazaqstanda ǵana emes, kúlli Ortalyq Azıada alǵash ret epılepsıanyń aýyr túrimen aýyratyn balaǵa tik gemısferotomıa ádisimen ota jasady. Nemis neırohırýrgi, profesor Ýlrıh Tomaleniń qatysýymen ótken operasıadan keıin bizdiń dárigerler taǵy qazaqstandyq 10 balaǵa ota jasady. Operasıalardyń bári mindetti áleýmettik medısınalyq saqtandyrý esebinen jasaldy. Esterińizge sala ketsek, 18 jasqa deıingi balalar memleket tarapynan saqtandyrylady. Balalar MÁMS paketindegi medkómekti tolyqqandy paıdalana alady.