Murat ótken jyldyń sońynda Jańaózende bolǵan úlken órtti sóndirý kezinde aýyr jaraqat alǵan.
10 kún boıy onyń jaǵdaıy turaqtandyrylyp, sodan keıin mańǵystaýlyq Murat Almatydaǵy Tórtinshi qalalyq aýrýhananyń travmatolog dárigerlerine jetkizildi. Bes aıdan astam ýaqyt boıy №4 qalalyq klınıkalyq aýrýhananyń kúrdeli travmatologıa jáne irińdi hırýrgıa bóliminiń dárigerleri onyń densaýlyǵy úshin kúresti, dep habarlaıdy Almaty-akshamy.kz.
«Súıek synyqtarynyń yǵysýymen sol jaq ókshe súıeginiń ashyq usaqtalǵan synýy, sol jaq tabannyń asyq súıeginiń synýy, súıek synyqtarynyń yǵysýymen 2, 3, 4, 5 sol jaq taban súıekteriniń jabyq synyǵy. Súıek synyqtarynyń yǵysýynsyz oń jaq taban býynynyń lateraldy tobyǵynyń jabyq jıektik synýy - kúrdeli klınıkalyq jaǵdaı. Naýqas bizdiń aýrýhanaǵa túskende onda teri men jumsaq tinderdiń nekrozy jáne aqaýymen sol jaq tabanynyń jyrtylǵan jarasy boldy. Bylaısha aıtqanda, 10 kún ótkennen keıin tin óle bastady. Hırýrgıalyq emdeý úsh kezeńde júrgizildi. Bizdiń bar taktıkamyz bir maqsatqa – naýqastyń aıaǵyn saqtap qalýǵa baǵyttaldy», - dep atap ótti №4 qalalyq klınıkalyq aýrýhananyń kúrdeli travmatologıa bóliminiń meńgerýshisi Andreı Fedotov.
Dárigerler ómir súrýge jaramsyz fragmentterdi alyp tastaǵan alǵashqy otadan keıin ókshe súıegi ashyldy. Naýqas ampýtasıanyń ar jaq ber jaǵynda boldy, biraq hırýrgtar teri aqaýyna plasıkalyq ota jasaýdy uıǵardy.
Ekinshi ota: nekroektomıa, teri aqaýyn sýraldy kesindimen vaskýlárly teri plasıkasy, Ilızarov apparatynda taban súıekteriniń teri arqyly osteosıntezi.
Jarany eki kezeńdik daıyndyqtan keıin dárigerler terini aýystyryp ornalastyrdy.
Tórt aı boıy tabannyń synǵan súıekterin emdeý Ilızarov apparatynda jalǵasty. 1 sáýirde apparat demontajtaldy - bári sátti ótti, mańǵystaýlyq qutqarýshynyń aıaǵy aman qaldy.
«Meniń bolashaǵym úshin kúresip, aıaǵymdy aman alyp qalǵan Almatydaǵy Tórtinshi aýrýhananyń travmatologtaryna, hırýrgtaryna, reanımatologtaryna jáne barsha ujymyna shyn júrekten alǵys bildiremin», - deıdi jańaózendik órt sóndirýshi Murat Jaqsylyq.