Almaty qalalyq jedel shuǵyl kómek kórsetý aýrýhanasy qan quıý beketine aınaldy. Saǵat tańǵy 8-den túski 2-ge deıin aýrýhana qyzmetkerlerin Qalalyq qan ortalyǵynyń ókilderi qabyldady, dep habarlaıdy Almaty-akshamy.kz.
Barlyq sanıtarlyq jáne qaýipsizdik normalaryn saqtaı otyryp, májilis zalynda kishigirim zerthana ornatyldy, munda árbir nıet bildirgen donor: óziniń qan tobyn; rezýs faktordy; gemoglobın deńgeıin teksere aldy.
Osylaısha qan alý aldynda árbir qyzmetkerdi ortalyq dárigeri qarap, taldaýlar alynyp, onymen áńgime júrgizildi.
Atalmysh qaıyrymdylyq naýqany QJSHKKA-da jyl saıyn ótkiziledi, tek koronavırýs kesirinen birneshe jyl ótkizilmeı qalǵan.
- Aýrýhana donorlyq qyzmetke belsendi qatysyp keledi. Bul shara bir jaǵynan yntymaqtastyq pen uıymshyldyqty nyǵaıtý bolsa, endi bir jaqtan qoǵamnyń ál-aýqatyn arttyrýǵa qosqan shaǵyn úlesimiz. Qalalyq qan ortalyǵynyń qoldaýymen ótkiziletin «Donor kúni» bizdiń dástúrimiz deýge bolady, - deıdi QJSHKKA bas dárigeriniń orynbasary Gúlnar Jantýova.
- Qan tapsyrýǵa tilek bildirýshilerdiń qatary jyldan-jylǵa kóbeıip keledi. Olardyń ishinde jastar kóp, bul qýantpaı qoımaıdy. Qandy kez kelgen deni saý, 18 jastan asqan, salmaǵy kem degende 50 kg bolatyn adam tapsyra alady. Árıne, donorlyqqa qarsy kórsetilimderi bolmasa. Bir adam tapsyratyn 450 ml qannyń fızıologıalyq dozasy úsh adamnyń ómirin saqtap qalýy múmkin. Almaty - úlken qala. Sondyqtan donorlyq qanǵa qajettilik qashanda bolady. Júıeli qan tapsyrý júrek-tamyr júıesin nyǵaıtyp, aǵzanyń ózin-ózi jańartý qyzmetin qamtamasyz etedi, - deıdi Nurdáýlet Abdykadyrov, Qalalyq qan ortalyǵynyń Donorlar jınaqtaý bóliminiń meńgerýshisi.
- Men buǵan deıin de qan tapsyrǵanmyn. Osylaı jyl saıyn búkil ujymmen qan donorlyǵyna qatysýǵa qýanyshtymyn. Seniń qanyń erteń bireýdiń ómirin qutqaratynyn bilý mańyzdy, - deıdi nefrolog-perfýzıolog dáriger Jansaıa Maqulbek.
- Qan tapsyrý - qaýipsiz jáne ıgi is, eger meniń qanym bireýge kómektesse, men qýanyshtymyn. Bizdiń aýrýhana qyzmetkerleri jıi qan tapsyrady. Al men búgin alǵash ret tapsyryp jatyrmyn. Osy jaqsy iske óz úlesimdi qosa alatynyma qýanyshtymyn. Aýrýhanamyzda qan ortalyǵynyń jyljymaly bólimshesinde, eshqaıda shyqpaı qan tapsyrýǵa jaǵdaı jasalǵany qýantady, – deıdi aýrýhana bas dárigeri orynbasarynyń m.a. Baýyrjan Omarov.
Donor kúnine aýrýhananyń 62 qyzmetkeri qan tapsyrýǵa nıet bildirdi, onyń 15-i medısınalyq kórsetkishterge baılanysty (gemoglobınniń tómen bolýy, qan tamyrynyń jińishke bolýy jáne t.b.) qan tapsyra almady. Osylaısha 47 qyzmetker barlyǵy 22 lıtr qan tapsyrdy.
Aýrýhana ákimshiligi qalalyq qan ortalyǵyna osyndaı múmkindik úshin jáne qan tapsyryp úlesin qosqan árbir qyzmetkerge osy sharaǵa qatysqany úshin zor alǵysyn bildiredi. Aýrýhana qyzmetkerleri kúndelikti jumysynda ǵana emes, muqtaj jandarǵa qan tapsyrý syndy ıgi sharalarda da birlik pen tártip úılesimdiligin kórsetti.
