Pýshkın kóshesiniń Raıymbek batyr dańǵylynan Gogol kóshesine deıingi bóligin abattandyra bastady. Bul jumys qalanyń ortalyq bóligin jańartý baǵdarlamasynyń aıasynda júzege aspaq. Óńirlik komýnıkasıalar qyzmeti uıymdastyrǵan baspasóz týry barysynda Qoǵamdyq keńistikterdi damytý basqarmasynyń basshysy Batyrhan Súleımenov osylaı dedi.
Pýshkın kóshesiniń atalǵan bóligi 2025 jyly tolyq jańǵyrtylady. Joba Almaty qalasynyń ortalyq bóligin keshendi abattandyrý baǵdarlamasy sheńberinde iske aspaqshy. Jobaǵa tapsyrys bergen – Almaty qalasynyń Qalalyq josparlaý jáne ýrbanıstıka basqarmasy, jobalaýdy «Almatygenplan» ǵylymı-zertteý ınstıtýty» JSHS ázirlegen.
«2023–2024 jyldary «Almatygenplan» jobalaý ınstıtýty osy kóshe boıynsha úlken zertteý jumysyn júrgizgen. Sol kezde kósheniń týrısik áleýeti óte joǵary ekenin anyqtadyq. Ony adamdar serýendeıtin, ýaqyt ótkize alatyn jaıaý júrginshiler keńistigine aınaldyrýǵa bolady. Bul aýdandaǵy eń tartymdy jerge aınalýy múmkin. Qazir biz qurylys-montaj jumystaryna kiristik», – dedi Batyrhan Súleımenov.
Jóndeý jumystary 6,5 gektar aýmaqty qamtyp, qaıta jańǵyrtylatyn jerdiń uzyndyǵy – 1,1 shaqyrym bolmaq. Joba aıasynda jaıaý júrginshiler men kólik ınfraqurylymyn jan-jaqty abattandyrý kózdelgen: jasyl aýmaqtyń kólemi 19 619,5 m² quraıdy. Jamylǵynyń jalpy aýmaǵy – 45 301,4 m², onyń ishinde 18 041,5 m² – asfáltbeton, 25 914,9 m² – beton trotýar plıtkalary. Sonymen qatar, 58 m² rezeńke jabyndy jáne 96 m² taktıldi plıtka tóseledi. Bul múmkindigi shekteýli azamattarǵa yńǵaıly bolmaq.
«Kósheniń eki jaǵynda da abattandyrylǵan jaıaý júrginshiler aımaǵy bolady. Biraq bul jobadaǵy eń mańyzdy tus – Maqataev kóshesinen Raıymbek batyr dańǵylyna deıingi aralyq. Óıtkeni dál osy jerde biz joldyń bóligin taryltyp, jaıaý júrginshilerge arnalǵan keńistikti ulǵaıtamyz. Munda tolyqqandy býlvar salynady. Tipti ony jaqyn mańdaǵy úılerdiń turǵyndary men osy aýdannyń halqy úshin salǵan saıabaq desek te bolady. Bul oryn aýdannyń ózegine, tartymdy núktesine aınalady. Sonymen qatar biz tek jaıaý júrginshilerdiń emes, júrgizýshiler men kólik quraldarynyń da qajettiligin eskerdik», – dedi Batyrhan Súleımenov.
Bul joba osy zamanǵy qalalyq ortany qalyptastyrýǵa baǵyttalǵan, qala ınfraqurylymyn jaqsartýǵa arnalǵan úlken jumystyń bir bóligi bolmaq.