Ótken jyly Qazaqstan 28 mlrd AQSH dollary bolatyn sheteldik tikeleı ınvestısıalardy ıelendi
Almatyda Eýrazıalyq damý bankiniń (EADB) uıymastyrýymen Azıa-Tynyq muhıt aýmaǵy damý ınstıtýttary qaýymdastyǵynyń (ADFIAP) 46-shy jyldyq jınalysy sheńberinde 40-tan astam el ınvestorlarynyń qatysýymen aýqymdy halyqaralyq forým ótip jatyr, dep habarlaıdy Almaty-akshamy.kz.
Forýmǵa 240 iri bank ókilderi, ınvestısıalyq qorlar men damý ınstıtýttary, atap aıtqanda Qytaı, Túrkıa, Japon, Úndistan, Fılıppın, Jańa Zelandıa, Eýropa elderi, AQSH, Latyn Amerıka, Taıaý Shyǵys jáne Eýropa Odaǵynyń memleketterinen ókilder qatysyp jatyr.
Premer-Mınıstrdiń orynbasary - Qarjy mınıstri jáne Qazaqstan Respýblıkasynyń EADB keńesindegi ókiletti ókiliniń orynbasary Erulan Jamaýbaev ADFIAP 46-shy jyldyq jınalysynyń qatysýshylaryna Prezıdent Qasym-Jomart Toqaevtyń alǵysózin oqyp berdi.
«Qazaqstan qarqyndy túrde ózara tıimdi ekonomıkalyq, ınvestısıalyq, saýda baǵyttaryndaǵy aımaqtyq jáne ǵalamdyq deńgeıdegi yntymaqtastyqty qoldap keledi», - delingen Qasym-Jomart Toqaevtyń alǵysózinde.
Prezıdent Qazaqstan agroónerkásip kesheni, munaı-hımıa, metalýrgıa, óńdeý jáne toqyma ónerkásibi, kólik jáne logıstıka, qarjy sektory men týrızm salalarynda zor kúsh-qýatqa ıe ekendigin atap ótken. Osy oraıda, ınvestısıalyq aýqattyń turaqty túrde damýy – memleket saıasatyndaǵy mańyzdy basymdyq.
Ótken jyly Qazaqstan 28 mlrd AQSH dollary bolatyn sheteldik tikeleı ınvestısıalardy ıelendi, bul – sońǵy onjyldyqtyń rekordtyq kórsetkishi. «Jalpy, tikeleı sheteldik ınvestısıa (TSHI) kólemi búginde 383 mlrd AQSH dollary kóleminde», - dep kórsetilgen Prezıdent sózinde.
Almatyda ótkizilip otyrǵan halyqaralyq forým Azıa-Tynyq muhıt aımaǵynda ınvestısıalyq yntymaqtastyqtyń artýyna qýatty serpin berip qana qoımaı, Azıa-Tynyq muhıty memleketteri men Qazaqstan Respýblıkasynyń qarjy-ekonomıkalyq seriktestigin keńeıtpek.