Kómir jaǵatyn elektr stansıalary men qazandyqtar ekologıalyq ahýaldyń nasharlaýyna ákep soqtyrdy
Memleket basshysy Qasym-Jomart Toqaevtyń tóraǵalyǵymen Qazaqstan Respýblıkasy Qaýipsizdik keńesiniń otyrysy ótti. Jıynda ekologıa jáne sý qaýipsizdigi máseleleri qarastyryldy, dep habarlaıdy Almaty-akshamy.kz.
Ekologıa jáne tabıǵı resýrstar mınıstri Zúlfıa Súleımenova ekologıalyq qaýipsizdiktiń jaı-kúıi jóninde baıandama jasady. Sondaı-aq birqatar memlekettik organ basshylary men óńir ákimderi jekelegen máseleler boıynsha esep berdi, delingen Aqorda habarlamasynda.
Prezıdent otyrys barysynda ekologıalyq qaýipsizdikke qater tóndiretin tabıǵı jáne antropogendik faktorlarǵa qarsy kúres asa mańyzdy ekenin atap ótti.
"Sońǵy jyldary kóptegen eldiń úkimetteriniń belsendiligi artty. Ekologıany jaqsartý, «jasyl» ekonomıkaǵa kóshý jáne kómirsýtegi beıtaraptyǵyna qol jetkizý úshin batyl sheshimder qabyldanyp jatyr. Urpaǵymyzdyń deni saý bolyp, aýasy taza elde ómir súrgimiz kelse jáne memleketimizdi búkil álem moıyndaǵanyn qalasaq, biz olardan úlgi alýymyz kerek", - dedi Qasym-Jomart Toqaev.
Memleket basshysy ekologıa salasynda shuǵyl sheshim qabyldaýdy qajet etetin problemalarǵa basa nazar aýdardy.
"Keńes kezeńinen kele jatqan kóptegen óndiris orny, kómir jaǵatyn elektr stansıalary men qazandyqtar ekologıalyq ahýaldyń nasharlaýyna ákep soqtyrdy", – dedi Prezıdent.
Budan bólek, jıynda qorshaǵan ortany qorǵaýǵa úlken jaýapkershilikpen qaraý jóninde birqatar másele kóterildi.