«Mıtraldy jetkiliksizdikti transkateterlik emdeýdiń zamanaýı tásilderi. DragonFly™ júıesi» atty master-klass barysynda Kardıologıa jáne ishki aýrýlar ǵylymı-zertteý ınstıtýtynyń ıntervensıalyq kardıologtary halyqaralyq mamandarmen birlesip hırýrgıalyq qaýiptiligi joǵary 71 jastaǵy naýqasqa mıtraldy qaqpaqshanyń qyzmetin qalpyna keltirý boıynsha operasıa jasady.
Pasıent aýyr mıtraldyq jetkiliksizdigine jáne stenokardıaǵa, 1-dárejeli arterıalyq gıpertonıaǵa, ınsýlınge táýeldi qant dıabetine, dıabettik polıneıropatıaǵa, mıokard ınfarktine shaldyqqan. Ony júrek soǵýynyń jıileýi jáne durys jumys istemeýi, fızıkalyq júkteme kezinde demigý, aıaǵynyń isinýi, jalpy álsizdik, sharshaǵyshtyq mazalaǵan.
«Biz klınıkalyq praktıkaǵa júrek-qan tamyr aýrýlaryn emdeýdiń zamanaýı, ǵylymı negizdelgen ádisterin engizýge umtylamyz. Bul tehnologıa ilespe aýrýlary bar jáne operasıadan keıingi asqynýlardyń joǵary qaýpine baılanysty «ashyq» operasıa jasatýǵa jaramaıtyn pasıentter arasynda Eýropanyń jetekshi klınıkalarynda jaqsy nátıjesin kórsetti. Mınıınvazıvti operasıalar aǵzaǵa aralasý kólemin jáne tinderdiń zaqymdaný deńgeıin barynsha azaıtýǵa múmkindik beredi, pasıentterdiń tez qalpyna kelýine jáne operasıadan keıingi kezeńniń qolaıly ótýine yqpal etedi», – deıdi Basqarma tóraǵasy Rústem Tóleýtaev.
Mıtraldy qaqpaqshany transkateterlik jolmen qalpyna keltirýdiń zamanaýı tehnologıalary boıynsha master-klass barysynda ınovasıalyq DragonFly™ júıesi qoldanyldy. Bul - Qytaıdaǵy «shetine deıin» (TEER) prınsıpimen mıtraldy qaqpaqshany transkateterlik rekonstrýksıalaýǵa arnalǵan alǵashqy qurylǵy jáne mıtraldy jetispeýshilikti emdeýdiń klınıkalyq turǵyda zerttelgen ıntervensıalyq ádisi.
Rentgenendovaskýlárlyq operasıa blogynyń meńgerýshisi Alekseı Kolesnıkovtyń aıtýynsha, TEER-terapıa — hırýrgıalyq qaýiptiligi joǵary naýqastarda mıtraldy qaqpaqsha fýnksıasyn qalpyna keltirýdiń halyqaralyq deńgeıde moıyndalǵan standarty. DragonFly™ júıesin qoldaný Qazaqstanda ıntervensıalyq kardıologıany odan ári damytýǵa jańa múmkindikter ashady jáne mıtraldy jetispeýshilikti mınımaldy ınvazıvti ádistermen emdeýdiń qoljetimdiligin arttyrady.
Operasıa sátti ótti. Pasıent ózin jaqsy sezinýde.
Master-klass barysynda mıtraldy qaqpaqsha jetispeýshiligin dıagnostıkalaý jáne emdeýdiń ózekti tásilderi usynyldy, DragonFly™ júıesiniń konstrýksıalyq erekshelikteri kórsetildi, klınıkalyq jaǵdaılar jáne tehnologıany naqty tájirıbede qoldaný erekshelikteri talqylandy. TEER tehnologıasynyń tıimdiligin rastaıtyn klınıkalyq derekterge sholý jasaldy. Otandyq jáne sheteldik mamandar tájirıbe almasty.