Ónim qoldanysqa jóneltilmeı turyp, arnaıy zerthanada tekserýden ótedi
Almatydaǵy asfáltbeton zaýytynda saǵatyna 300 tonnadan astam ónim shyǵaratyn jańa qurylǵy iske qosyldy, dep habarlaıdy Almaty-akshamy.kz Almaty.tv-ge silteme jasap.
Mamandardyń aıtýynsha, halyqaralyq standartqa saı bul qurylǵy aldyńǵyǵa qaraǵanda 3 ese myqty. Máselen, qazir saǵatyna 300 tonnadan astam asfáltbeton óndirip jatyr. Óndirilgen ónim óz retinde respýblıkalyq mańyzy bar tas jolǵa jáne qaladaǵy kóshelerdiń qurylysy barysynda qoldanylady.
«Almatydan 100 shaqyrymdaı jerge deıin tasymaldanady. Alaıda asfaltbetonnyń kóp bóligi shahardaǵy kóshelerge tóseledi. Jańa qurylǵynyń arqasynda ónim daıyndaý jyldamdyǵy da, sapasy da artty», – dedi óndiris basshysy Aleksandr Stefanov.
Mamandardyń aıtýynsha, buryn turǵan qurylǵy saǵatyna 100 tonnadan aspaıtyn ónim ǵana bergen. Sondyqtan júk kólikteri uzyn sonar kezekte turatyn deıdi. Zaýytqa kelgen sheteldik mamandar da jańa qurylǵynyń jumysymen tanysyp, jalpy óndiris ornyna óz baǵasyn berdi.
«Aıadaı ǵana jerde aýqymdy jumys júrgizilip jatqany meni tańǵaldyrdy. Bul jerdi óz kózimmen kórip, ózgeshe ádisterdi baıqadym. Mundaǵy qyzmetkerler óz isiniń maıtalmany ekenin ańǵardym», – dedi sheteldik kompanıa ókili Meds Djenefk (Danıa).
Zaýyt aýmaǵynda asfalbeton óndirisine arnalǵan 4 qurylǵy bar. Olar Almanıadan jáne Italıadan ákelingen. Odan shyqqan ónim qoldanysqa jóneltilmeı turyp, arnaıy zerthanada tekserýden ótedi.