Almaty qalasynda kóshi-qon zańnamasyn buzý derekterin anyqtaýǵa jáne jolyn kesýge, sondaı-aq shetel azamattarynyń zańsyz eńbek qyzmetine tosqaýyl qoıýǵa baǵyttalǵan respýblıkalyq "Zańsyz kelýshi" jedel-profılaktıkalyq is-sharasy bastaldy, - dep habarlaıdy Aqshamnews.kz Polisia.kz-ke silteme jasap.
Bul is-shara İshki ister mınıstrligi jarıalaǵan Profılaktıka jyly aıasynda jáne Memleket basshysy aıqyndaǵan "Zań men tártip" qaǵıdatynyń aıasynda júzege asyrylýda. Tekserý barysynda shetel azamattarynyń elde bolý zańdylyǵy, eńbek ruqsattarynyń bar-joǵy, sondaı-aq jumys berýshilerdiń kóshi-qon zańnamasynyń talaptaryn saqtaý máselelerine erekshe nazar aýdarylýda.
- Bul baǵyttaǵy profılaktıkalyq jumys tek quqyq buzýshylyqtardy anyqtaýǵa ǵana emes, kóshi-qon prosesine qatysýshylar arasynda quqyqtyq sanany qalyptastyrýǵa da baǵyttalǵan. Biz shetel azamattaryna Qazaqstan Respýblıkasynyń zańdaryn saqtaý qajettiligin túsindiremiz, al jumys berýshilerge – zańsyz eńbekti paıdalanǵany úshin olardyń jaýapkershiligin eskertemiz. Elge kelgen árbir adam mynany túsinýi tıis: elde bolý men eńbek qyzmetiniń zańdylyǵy – qaýipsizdik pen quqyqtyq tártiptiń negizi. Almaty – zań ústemdigi saqtalatyn qala bolyp qalýy tıis, – dedi Almaty qalasy PD kóshi-qon qyzmeti basqarmasynyń bastyǵy Erkin Amantaev.
Polısıanyń málimetinshe, is-sharanyń alǵashqy kúnderinde Almatyda ondaǵan zańsyz eńbek etý deregi anyqtaldy. Quqyq buzýshylarǵa qatysty ákimshilik hattamalar toltyrylyp, materıaldar sotqa joldandy.